Թալիշ գյուղն ադրբեջանական վերահսկողության ներքո չէ, իսկ Քարվաճառում մարտական գործողություններ են ընթանում. Հովհաննիսյան

Թալիշ գյուղը ադրբեջանական վերահսկողության ներքո չէ, բայց ադրբեջանական զորքերը գյուղի մատույցներում են՝ այսօր տեղեկացրեց ՀՀ ՊՆ ներկայացուցիչ Արծրուն Հովհաննիսյանը՝ անդրադառնալով ադրբեջանական կողմի հրապարակած տեսանյութերին: 

«Քանի որ հյուսիսային ուղղությամբ մենք կատարել ենք  համապատասխան զորքերի վերախմբավորումներ Թալիշ - Մատաղիս ուղղությամբ, հետևաբար կարող են նման տեսանյութեր հրապարակվել,- ասաց Հովհաննիսյանը՝ հավելելով,- ես մի քանի անգամ շեշտել եմ, խնդրել եմ, որ կոնկրետ գյուղերի, դիրքերի,  կոնկրետ մատույցների վերաբերյալ հրապարակումներից չկատարենք այնպիսի եզրակացություններ և  քննարկումներ, որ արդյո՞ք այս բլուրը, այս բնակավայրը մենք վերահսկում ենք, թե՞ ոչ»:

Հովհաննիսյանը հայտնեց, որ այսօր խոցվել են հակառակորդի 3 ԱԹՍ, 3 զրահատեխնիկա և 1 ինքնաթիռ, մոտ 200 ադրբեջանցի է սպանվել։

ՀՀ ՊՆ ներկայացուցիչը ասաց, որ Քարվաճառում էլ ընթանում են մարտական գործողություններ։

«Այսօրվա ինքնաթիռը հենց այդ ուղղությամբ է խոցվել։ Մարտերն ինտենսիվությամբ, կարող է՝ զիջում են ավելի հարավում տեղի ունեցող մարտական գործողություններին, բայց այնպես չէ, որ այնտեղ խաղաղ իրավիճակ է»,- ասաց Հովհաննիսյանը։