«Նախ՝ դիմակ կրելը մեկ բան է, ճիշտ կրելը այլ բան է, որ կարողանանք այս միջոցառումներն ավելի արդյունավետ իրականացնել։ Բոլոր երկրներում արվում են այն միջոցառումները, ինչ արվում է Հայաստանի Հանրապետությունում, ուղղակի այստեղ մի փոքր կարգապահության հարց կա, նաև վերաբերմունք է պահանջում այս հիվանդությունը և աչալրջություն։ Ուղղակի պետք է հորդորներին ականջալուր լինել, այն առաջարկությունները, որոնք այսօր պետական ատյանների կողմից հրապարակվում են, պետք է իրականացնել։ Յուրաքանչյուրս պետք է պատասխանատվությունը վերցնենք մեզ վրա, որ կարողանանք այս իրավիճակից հավուր պատշաճի դուրս գալ»,- նշեց Թորոսյանը։
Համաճարակաբանը հորդորեց՝ թուլություն, տկարություն զգալիս խուսափել աշխատանքի գնալուց և տնից դուրս գալիս, աշխատանքի գնալիս, հանրային տրանսպորտից օգտվելիս, բազմամարդ վայրերում կիրառել պաշտպանիչ բոլոր միջոցառումները՝ դիմակներ, ձեռնոցներ կրել, ախտահանումներ անել հաճախակի։
«Դիմակը պետք է կրել ճիշտ․ մետաղական լարը վերև՝ հպված քթի ոսկրային հատվածին, և փակված ամբողջ բերանային հատվածը։ Ոչ թե դիմակը կրել քթի տակից, ինչը բացարձակապես արդյունավետ չէ։ Անընդհատ ձեռքերը լվանալ, ախտահանել, պահպանել սոցիալական հեռավորություն՝ 1,5-2 մետր, փակ տարածքները օդափոխել, անընդհատ ջերմաչափվել, որ ինքներս կարողանանք մեր մարմնի ջերմությունը մոնիթորինգի ենթարկել»,- նշեց Լիանա Թորոսյանը։
ԱՆ վարակիչ հիվանդությունների համաճարակաբանության բաժնի պետը հորդրեց հնարավորության սահմաններում մասսայական միջոցառումներից խուսափել, հուղարկավորության արարողությունները կազմակերպել հնարավորինս փոքր կազմով։
