Այս տարի ընտանեկան բռնության հետևանքով սպանության դեպք չի արձանագրվել, բայց բռնության դեպքեր եղել են

Այս տարի ընտանեկան բռնության հետևանքով սպանության դեպք չի արձանագրվել, բայց բռնության դեպքերի ահազանգեր հասարակական կազմակերպությունները շատ են ստացել:

Իրավապաշտպան Զարուհի Հովհաննիսյանը հիշեցնում է վերջերս արձանագրված աղմկահարույց դեպքը, երբ ամուսինը խոշտանգել էր երիտասարդ կնոջը, դաժանաբար ծեծել, կտրել մազերը:

Զարուհի Հովհաննիսյան (իրավապաշտպան) - Զանգահարել է թեժ գիծ ու ոստիկանության միջոցով տեղափոխվել ապաստարան: Երեխայի հետ բնակվում է ապաստարանում՝ ապահով տանն է երեխայի հետ, և ընթացքը հետևյալն է՝ պետք է կատարվեն քննչական գործողություններ, առերեսում: Աջակցման կենտրոնը միջնորդել է, որ այդ գործողությունները կատարվեն ապահով տարածքում, այլ ոչ թե մարզում, այնտեղ, որտեղ դեպքն է եղել:

Նախորդ տարի քննչական կոմիտեի վարույթում քննվել է ընտանեկան բռնության վերաբերյալ 960 քրեական վարույթ, որոնցից 122-ն ավարտվել է մեղադրական եզրակացությամբ և 126 անձի վերաբերյալ ուղարկվել է դատարան, 301 քրեական վարույթ կարճվել է, որից 150-ը` ռեաբիլիտացնող, իսկ 151-ը` ոչ ռեաբիլիտացնող հիմքով։ 383 քրեական վարույթ փոխանցվել է այս տարվա հունվար:

Զարուհի Հովհաննիսյան - Գիտենք, որ տարվա երկորոդ կեսին ուժի մեջ է մտել նոր Քրեական օրենսգիրքը, այսինքն՝ մենք չունենք դեռ միասնական մոտեցում այդ տվյալներին, և, ոչ ռեաբիլիտացնող հիմքով կարճված քր. գործերը, օրինակ, մյուս տարի չեն լինի, քանի որ Քրեական օրենսգիրքը տանելու է գործերը մինչև վերջ, անկախ նրանից՝ մարդը դիմումը հետ վերցրե՞ց. թե՞ ոչ: Այսինքն՝ հանրային մեղադրանք է գնում, որովհետև պետությունը ճանաչում է, որ ընտանեկան բռնությունը հանրային խնդիր է, հանրային վարք է, որը վնասում է ամբողջ հանրությանը:

Քննչական կոմիտեի տվյալները փաստում են, որ դատարան ուղարկված 122 վարույթից 9-ը եղել է սպանության, 1-ը՝ մարդուն առևանգելու, 1-ը՝ սեքսուալ բնույթի գործողությունների, 2-ը՝ 16 տարին չլրացած անձի նկատմամբ սեքսուալ բնույթի գործողություններ կատարելու, 1-ը՝ ծնողի կամ այլ մերձավոր ազգականի և երեխայի միջև տեսակցության իրականացմանը խոչընդոտելու դեպքերի առթիվ:

Դատարան ուղարկված վարույթներով 125 մեղադրյալից 108-ը ամուսիններ են եղել, 4-ը՝ տատ կամ պապ, 5-ը՝ քույր կամ եղբայր, 8-ը՝ զավակ կամ թոռ:

Զարուհի Հովհաննիսյան - Մենք հավաքել են 16 կնասպանության դեպք. այդտեղ, իհարկե, չեն արտացոլվում զուգընկերային հարաբերությունները, որովհետև ընտանեկան բռնության օրենքում զուգընկերայինները չեն դիտարկվում ընտանեկան հարաբերություններ:

Իրավապաշտպանը նշում է, որ դեռ սեռային մոտեցման հետ կապված խնդիրներ կան. հստակեցված չէ, թե որ ամուսինն է բռնության զոհը, իսկ որը՝ բռնարարը:

Զարուհի Հովհաննսիյանը մյուս կարևորագույն խնդիրը համարում է այն, որ ընտանեկան բռնությունը դեռ սահմանված չէ Քրեական օրենսգրքում որպես առանձին հանցագործություն, այն ընդամենը ծանրացնող հանգամանք է: Դրանց շարքում են, օրինակ, արյունակցական կապ ունեցողների միջև տարբեր վեճերի հետևանքով գրանցված քրեական հանցագործությունները, և սա այն դեպքում, երբ գենդերային գործոնը բացակայում է, իսկ ընտանեկան բռնությունը, ըստ իրավապաշտպանի, պետք է սահմանվի որպես ուժի և իշխանության անհավասար բաշխում:

Զարուհի Հովհաննիսյան - Ունենք լուրջ խնդիր գրագետ կանխարգելման հետ կապված, որպեսզի քրեական հանցագործության չվերածվի, ունենք հասարակության իրազեկման բարձրացման խնդիր, ունենք աջակցության տրամադրման գրագետ խնդիր:

Իրավապաշտպանը հորդորում է չհանդուրժել բռնությունը, վախի մթնոլորտում բռնության զոհ չդառնալ ու անհրաժեշտության դեպքում դիմել համապատասխան մարմիններին: