ՌԴ-ում ՀՀ դեսպանատան մշակութային կենտրոնը՝ երկու ժողովուրդներին կապող ևս մեկ օղակ
Մոսկվայի «Հայկական» կոչվող նրբանցքի պատմությունը 200 տարուց ավելի է՝ առնչություն ունի հայերի հետ։ Այն մայրաքաղաքի եզակի վայրերից է, որը չի տուժել 1812 թվականի խոշորագույն հրդեհից, իսկ փրկության գործում առանցքային դեր է խաղացել Նապոլեոնի հայազգի թիկնապահ Ռուստամ Ռազան։ Այս վայրը հատուկ դեր է ստացել XVIII դարի կեսերին՝ Լազարյանների ընտանիքի հաստատվելուց հետո: Այժմ Լազարյանների տանը Հայաստանի դեսպանությունն է, որտեղ գործում է նաև մեծ մշակութային կենտրոնը: 1953-ից փակված կենտրոնն այս տարի նշում է վերաբացման 4-ամյակը:
Վլադիմիր Գաբբե (ՌԴ-ում ՀՀ դեսպանության մշակութային կնետրոնի ղեկավար) - Մշակութային կենտրոնի և նրա գաղափարախոսության ամենագլխավոր բաղադրիչը ոչ միայն մեր ինքնության պահպանումն է իր պատմական հայրենիքից դուրս, մեր երիտասարդության զարգացումը, այլ նաև հայ-ռուսական մշակութային կապերի ամրապնդումը: Այսօր մենք կարող ենք առավել վառ, առավել արժանապատիվ ներկայացնել մեր հարուստ մշակույթն ու պատմությունը ոչ միայն հայերին և հայկական սփյուռքին, այլև ամբողջ աշխարհին:
Դիվանագիտական ներկայացուցչության մշակութային կենտրոնի վերածննդի օրվան նվիրված հանդիսավոր երեկոն սկսվեց կենտրոնի պատմության և գործունեության մասին տեսանյութի ցուցադրությամբ: Ողջույնի խոսքում Ռուսաստանում Հայաստանի դեսպանն ընդգծեց կենտրոնի կարևորությունը, որի գործունեությունն ուղղված է Ռուսաստանում հայկական մշակույթի հանրահռչակմանը:
Վաղարշակ Հարությունյան (ՌԴ-ում ՀՀ արտակարգ և լիազոր դեսպան) - Ունենք նաև ծրագիր, որ այս մշակութային կենտրոնը տեղափոխենք Ռուսաստանի տարբեր համայնքներ։
Պարի, երգի ու լեզվի ուսուցման միջոցով հայերը հայրենիքը ճանաչելու, նրա հետ կապ հաստատելու հնարավորություն են ստանում: Գործում է նաև վերջերս բացված հայագիտության ամբիոնը: Այստեղ ոչ միայն սերտում, այլև երգում ու սիրում են հայերեն:
Հայ-ռուսական մշակութային դիվանագիտությունը թեև հին ավանդույթ է, բայց ներկայումս վերածնված, ինչն արվեստի լեզվով երկխոսելու նոր հնարավորություններ է ընձեռում: Տուրգենև, Ստանիսլավսկի, Սվետլով. այստեղ մշակույթ են կերտել ոչ միայն հայերը: Հին ավանդույթների վերականգնումը ոգևորում է նաև ռուս մշակութային գործիչներին:
Անդրեյ Կոլոտուշկին (դիրիժոր, ՌԴ վաստակավոր արտիստ) - Առաջին անգամ եմ այստեղ ու պարզապես զարմանում եմ, թե ինչ ջերմությամբ, ինչ սիրով են մարդիկ պահպանում իրենց արմատները, և հպարտանում եմ, որ Ռուսաստանն ու Հայաստանը երկու մեծ բարեկամ ժողովուրդներր են, որոնց ավելի է մերձեցնում մշակույթը:
Դավիթ Մնացականյան (դիվանագետ, կոմպոզիտոր) - Այսօրվա երեկոն ինձ համոզեց, որ մշակույթը՝ ավելի լայն առումով, և հատկապես՝ երաժշտությունը, երբեմն լավագույն դիվանագիտությունն են՝ տարբեր մշակույթների ափերը միացնող ամուր կամուրջ, իսկ այժմյան անհանգիստ ժամանակներում՝ նույնիսկ լավ թերապիա։ Ես դա ասում եմ որպես դիվանագետ և կոմպոզիտոր:
Հայ-ռուսական դիվանագիտական հարաբերությունների 30-ամյակի կապակցությանբ կենտրոնը պատրաստվում է մեծ «Հայաստան-Ռուսաստան» ֆորումին: Համաժողովի նպատակն է միավորել պատմության, գիտության և մշակույթի լավագույն գործիչներին, որոնք ստեղծագործում են Ռուսաստանում և հետաքրքրված են Հայաստանի պատմությամբ ու մշակույթով, իրենց ուրույն ներդրումն են ունեցել Հայաստանի մշակութային ժառանգության պահպանման ու զարգացման գործում:
