Աջակցել ոչ միայն ֆինանսապես, այլև գիտելիքներով: Մայքրոսոֆթի, Գուգլի, Ֆեյսբուքի, Ամազոնի և տեխնոլոգիական այլ հայտնի ընկերություններում աշխատող հայ երիտասարդները եկել են Հայաստան, հիմնել ակադեմիա և սկսել ծրագրավորման դասընթացներ:
Տեխնոլոգիական հսկա ընկերություններում աշխատող մեր հայրենակիցները եկել են զարգացնելու հայկական ԱՅԹ-ին, երիտասարդներին փոխանցել իրենց փորձն ու մոտիվացիան: Կարեն Ալեքսանյանը 6 տարի աշխատել է Մայքրոսոֆթում, 7 տարի՝ Գուգլում։ Հիմա Երևանում դասախոսում է իրենց հիմնած ակադեմիայում: Ուսուցումն անվճար է, պնդում է՝ կայուն ոլորտ՝ Հայաստանի համար:
Երեք կիսամյակ կսովորեցնեն ծրագրավորում: Առաջին փուլում կծանոթացնեն նախնական ուղղություններին, հետո՝ բուն ծրագրավորում: 21 երիտասարդ արդեն ընդունվել է, ընդունելությունը պարբերաբար է: Ծրագրավորման ամբողջական կուրսը հարմարեցրել են հայկական շուկայի պահանջարկին՝ ըստ ուղղությունների:
Ակադեմիայում սովորելու համար պետք է լինել 17 տարեկանից բարձր, ընդունելությունը հարցազրույցով է: Ընդունվելու համար երկու պարտադիր պայման կա՝ տրամաբանություն ու նախաձեռնողականություն, չունենալ վախ՝ նոր մասնագիտություն սովորելուց։ Ընդունված 21 ուսանողների մեծ մասը բարեհաջող հաղթահարել է առաջին փուլը:
Կարևորն, ըստ մասնագետների, սովորեցնում են ինչպես սովորել: Վստահ են՝ միայն առաջին փուլում ստացած ոչ այնքան խորքային գիտելիքներով հաջողության հասածներն արդեն հաջորդ փուլերում իրենց գաղափարները կիրագործեն:
Այս ամիս ևս հավաքագրել են ուսանողների և շարունակում են ընդունելությունը: Թիմին նոր դասախոսներ են միացել աշխարհի առաջատար ընկերություններից: Նախատեսում են այս նախաձեռնությունը դարձնել երկարաժամկետ, այնքան ժամանակ, որքան պահանջարկ լինի:
