ԱԺ փոխնախագահ Ալեն Սիմոնյանը խորհրդարանում լրագրողների հետ ճեպազրույցում անդրադարձավ նախկին իշխանություններին պատկանող և, ըստ էության, քաղաքական պատվերներ կատարող լրատվամիջոցներին:
«Հայաստանում հեղափոխությունից հետո Ռոբերտ Քոչարյանի, Միքայել Մինասյանի և էլի նախկին իշխանության տարբեր ներկայացուցիչների միջև եղան բազմաթիվ առքուվաճառքի պայմանագրեր: Դրանց մեջ մտան «Թիվ 5» հեռուստաալիքը, News.am-ը, եթե չեմ սխալվում ու էլի շատ ու շատ ԶԼՄ-ներ: Այդ ամենն արվել է մեկ բանի համար՝ քաղաքական նպատակ սպասարկելու համար: Այդ լրատվամիջոցները վճարվում են մի բանի համար, որ ստեղծվի իրականություն:
Հետագայում այդ քաղաքական գործիչներն ընկնում են հենց իրենց ծուղակի մեջ: Այդ լրատվամիջոցներն իրենք ստեղծում են, որ վարկաբեկեն իշխանությանը: Նույն լրատվամիջոցներն իրենք դիտում են և հավատում են, որ, օրինակ՝ իշխող կուսակցության վարկանիշը շատ ցածր է, իրենցը՝ շատ բարձր է: Բայց իրականում իրենք ուղղակի ՀՀ քաղաքական դաշտում գոյություն չունեն: Իրենց տեղը խոհանոցն է, իրենց տեղը հաճախ նաև բանտախուցն է, իրենց տեղը մոռացության մատնվելն է»,- նշեց Ալեն Սիմոնյանը:
