Միացյալ Նահանգները դուրս է եկել Կոռուպցիայի դեմ պայքարի պետությունների խմբից (GRECO), որը ստեղծել է Եվրոպայի խորհուրդը (ԵԽ)՝ 1999 թվականին: Այս մասին հայտնել է ABC News-ը՝ հղում անելով ԱՄՆ Պետքարտուղարության խոսնակին:
Հեռուստաալիքի տվյալով՝ ԱՄՆ-ն պաշտոնական ծանուցում է ուղարկել կազմակերպությունից դուրս գալու մասին: Եվրոպայի խորհուրդը ափսոսանք է հայտնել այդ որոշման կապակցությամբ՝ հուսալով, որ համագործակցությունը վերսկսվի: «GRECO-ն նախկինի պես բաց է Միացյալ Նահանգների հետ համագործակցության վերսկսման համար՝ Կոռուպցիայի կանխարգելման համատեղ ջանքերի շրջանակներում», - նշվում է ԵԽ հայտարարության մեջ:
Եվրոպայի խորհուրդը GRECO-ն ստեղծել է որպես 1999 թվականի հունվարի 27-ին Ստրասբուրգում ստորագրված Կոռուպցիայի դեմ քրեական իրավունքի կոնվենցիայի պահպանմանը հետևող մարմին: Մասնակցելու իրավունք ունեն և՛ ԵԽ անդամ, և՛ ոչ անդամ պետությունները: Միացյալ Նահանգները GRECO-ին միացել է 2000 թվականին:
