Հոգևոր կյանքին հաղորդակցությունը պետական բյուջեի ծախսային տող է, որովհետև այսօր մեր պատմամշակութային բազմաթիվ հուշարձաններ, որոնք հոգևոր կյանքի անբաժանելի մաս են, որպես պատմամշակութային հուշարձան պատկանում են պետությանը, այսինքն՝ պետության սեփականությունն են և պետության հոգածության ներքո են: Այդ մասին ԱԺ մշտական հանձնաժողովների համատեղ նիստի ժամանակ՝ 2024 թվականի պետբյուջեի կատարողականի նախնական քննարկումներին, ասաց վարչապետ Նիկոլ Փաշինյանը:
«Ենթակառուցվածքներ պետք է լինեն, որպեսզի մարդիկ հնարավորություն ունենան հաղորդակցվել հոգևոր արժեքների հետ, բայց նաև Կառավարությունը պետք է խստիվ վերահսկողություն սահմանի, որպեսզի (ինչպես արդեն առիթ ունեցել եմ ասելու) ոմանք այդ պատմամշակութային հուշարձանները չուլան չդարձնեն, որովհետև դա վիրավորում է մարդկանց հոգևոր զգացումները»,- ասաց նա:
Հիշեցնենք, որ Կառավարության՝ մայիսի 29-ի նիստին Փաշինյանը պատմել էր, որ մի քանի եկեղեցիներ, տաճարներ է այցելել և սանիտարական վիճակի հետ կապված խնդիրներ է արձանագրել, ապա այս համատեքստում հայտարարել էր՝ մեր եկեղեցիները չուլանացված են:
