Այսօր Ադրբեջանը բնական գազ է մատակարարում 12 երկրի։ Դրանցից 10-ը եվրոպական երկրներ են, ի թիվս որոնց՝ 8-ը՝ Եվրամիության անդամներ։ Այդ մասին Իլհամ Ալիևը հայտարարել է Հարավային գազային միջանցքի խորհրդատվական խորհրդի 11-րդ և Կանաչ էներգիայի խորհրդատվական խորհրդի 3-րդ նախարարական նիստերի ժամանակ։
«Եվրոպա գազի մեր մատակարարումների աշխարհագրությունը անկասկած կընդլայնվի, քանի որ մենք արդեն աշխատում ենք եվրոպական մի շարք երկրներում գազաբաշխիչ ցանց ստեղծելու ուղղությամբ։ Որոշ երկրներում այն կա, մյուսներում պետք է ընդլայնվի: Ադրբեջանը ծրագրում է դա անել»,- նշել է Ալիևը։
Նրա խոսքով՝ Հարավային գազային միջանցքը ներկայումս աշխատում է ամբողջ հզորությամբ։ Հարավկովկասյան խողովակաշարը, TANAP-ը և TAP-ը այդ միջանցքի երեք անբաժանելի մասն են և դրանք ընդլայնելու համար անհրաժեշտ են ֆինանսական միջոցներ:
Ալիևի համոզմամբ՝ «միջազգային ֆինանսական ինստիտուտները, այն ինստիտուտները, որոնք որոշում են կայացրել կասեցնել օգտակար հանածոների հետ ուղղակիորեն կապված նախագծերի ֆինանսավորումը, գուցե պետք է դադարեցնեն այդ քաղաքականությունը»։
