ԱՄՆ պետքարտուղար Մարկո Ռուբիոն, Մյունխենում անվտանգության համաժողովին և G7-ի արտգործնախարարների հանդիպմանը մասնակցելուց հետո կայցելի Մերձավոր Արևելքի երկրներ, հայտնել է ԱՄՆ Պետքարտուղարությունը։
Այցերը տեղի կունենան փետրվարի 15-18-ը, և քննարկման կենտրոնական թեմաները կլինեն ՀԱՄԱՍ-ի պատանդների ազատ արձակումը, Գազայի հատվածում հրադադարի համաձայնագրի երկրորդ փուլին անցումը, ինչպես նաև «Իրանի և նրան ենթակա ուժերի ապակայունացնող գործողություններին դիմակայելը»՝ նշել է Պետդեպարտամենտը։
Ամերիկյան լրատվամիջոցները նշում են, որ Ռուբիոյի առաջին այցը տարածաշրջան՝ պաշտոնը ստանձնելուց ի վեր, տեղի է ունենալու «Գազայի հատվածի վերաբերյալ ԱՄՆ նախագահ Դոնալդ Թրամփի ծրագրի շուրջ բարձրացված աղմուկի ֆոնին»:
Ավելի վաղ արաբական հինգ երկրի արտգործնախարարներն ու պաղեստինցի բարձրաստիճան պաշտոնյան նամակ էին ուղարկել Ռուբիոյին՝ «անհանգստություն հայտնելով Գազայի հատվածից պաղեստինցիներին վտարելու Թրամփի ծրագրի վերաբերյալ», պահանջելով, որ պաղեստինցիները «մասնակցեն անկլավի վերականգնման գործընթացին»։
