ՊԵԿ-ը շարունակում է իրականացնել հարկ վճարողների իրազեկման և աջակցման ծրագիրը
Պետական եկամուտների կոմիտեի հարկ վճարողների ընթացիկ հսկողության հարկային տեսչություն-վարչությունն իրականացնում է վարսավիրական և գեղեցկության ծառայությունների մատուցման ոլորտի իրազեկման և աջակցման ծրագիր։ Ծրագրի նպատակն է խթանել կամավոր հարկային կարգապահությունը, նվազեցնել հարկային ռիսկերը և ամրապնդել պետություն-գործարար գործընկերությունը։
ՊԵԿ աշխատակիցներն այցելել են վարսավիրական և գեղեցկության ծառայությունների մատուցման ոլորտի շուրջ 2300 տնտեսվարողի՝ ներկայացնելով հարկային օրենսդրության հիմնական պահանջները, այդ թվում՝ յուրաքանչյուր ծառայությունից հետո ՀԴՄ կտրոն տրամադրելու, աշխատողներին պատշաճ գրանցելու և հարկային հաշվետվությունները սահմանված ժամկետներում ներկայացնելու անհրաժեշտությունը։
Իրազեկման և աջակցման ծրագիրը շարունակական է և կիրականացվի նաև մարզերում ու տնտեսության այլ ոլորտներում։
