Հունաստանում Հայաստանի դեսպանությունը հայտնում է, որ Ամինդեոյի քաղաքային խորհուրդն ընդունել է Հայաստանի ժողովրդին աջակցող բանաձև։
«Սույն բանաձևով Ամինդեոյի քաղաքային խորհուրդն իր աջակցությունն ու համերաշխությունն է հայտնում հայ ժողովրդին ս.թ. սեպտեմբերի 27-ի առավոտյան Ադրբեջանի Հանրապետության կողմից Արցախի Հանրապետության (Լեռնային Ղարաբաղ) դեմ սանձազերծված հարձակման մեջ:
Ադրբեջանի զինված ուժերը դիմել են Լեռնային Ղարաբաղի / Արցախի դեմ լայնամասշտաբ հարձակման՝ թիրախավորելով խաղաղ բնակչությանը, ներառյալ Ստեփանակերտ քաղաքի դպրոցները: Այդ լայնամասշտաբ հարձակումն իրականացվում են հրթիռներով, անօդաչու թռչող սարքերով և ուղղաթիռներով: Հարձակման հետևանքով կան զոհեր խաղաղ բնակչության շարքերում: Խոսքը իրավիճակի չափազանց մտահոգիչ էսկալացիայի մասին է, ինչը կարող է աղետալի հետևանքներ ունենալ ողջ տարածաշրջանի համար, ներառյալ ԵՄ-ն։ Այս անգամ ադրբեջանական բանակի հարձակումները հատում են սահմանային գծերն ու այժմ թիրախավորում են քաղաքներն ու գյուղերը, դպրոցներն ու խաղաղ բնակչությանը:
Հունաստանի համար Լեռնային Ղարաբաղի հակամարտությունը կարևոր է երկու տեսանկյունից: Առաջինը վերաբերում է բուն պատերազմին մի տարածքում, որն արդեն տասնամյակներ սպասում է խաղաղ ճանապարհով ճգնաժամի վերջնական լուծմանը:
Երկրորդ տեսանկյունը Թուրքիայի ներգրավումն է, նրա իմպերիալիստական և հեգեմոն տերություն դառնալու ջանքերը: Այն ժամանակ, երբ շարունակաբար խոսվում է հակամարտության և ռազմական գործողությունների դադարեցման նախաձեռնությունների մասին, Թուրքիան նախընտրում է ակտիվ ռազմական գործողություններ:
Ցեղասպանության համար հայ ժողովրդից ներողություն խնդրելու փոխարեն Թուրքիան կրկնում է հայերի դեմ իրագործած իր հանցավոր գործողությունները:
Միջազգային հանրությունը, բացի խաղաղության կոչերից, պետք է գործնական քայլեր ձեռնարկի ապաէսկալացիայի, երկխոսության վերսկսման և Թուրքիային մեկուսացնելու ուղղությամբ:
Ամինդեոյի քաղաքային խորհուրդը. դատապարտում է Ադրբեջանի ռազմական հարձակումը Լեռնային Ղարաբաղի վրա, դատապարտում է հայերի նկատմամբ Թուրքիայի մարդասպան վարքագիծը, կողմ է մշտական լուծմանը, որը հարգում է երկրների տարածքային ինքնիշխանությունն ու տարածաշրջանի ժողովուրդների ազգային ինքնությունը, Լեռնային Ղարաբաղի անկախության և Լեռնային Ղարաբաղի միջազգային ճանաչման արդար պայքարում կանգնած է հայ ժողովրդի կողքին»,- ասված է հայտարարությունում։
