«Մենք վերաձևակերպեցինք, որ հեռավար կրթությունը կրթական ծրագրի իրականացման ձև է. հանվել է «այլընտրանքային» բառը, որպեսզի այն դպրոցների համար ամբողջությամբ հեռավար կրթության անցնելու պատրվակ չդառնա»՝ Ազգային ժողովում ասել է ԿԳՄՍ նախարարը: Արայիկ Հարությունյանը ներկայացրել է կառավարության ներկայացրած «Հանրակրթության մասին» և «Երևան քաղաքում տեղական ինքնակառավարման մարմինների մասին» օրենքներում լրացում կատարելու մասին» օրենքների նախագծերի փաթեթը երկրորդ ընթերցմամբ ընդունելու հարցը:
Նախարարի խոսքով՝ եթե, օրինակ, երկու անգամ ուսուցչի մրցույթ է կազմակերպվել, և տվյալ տեղի համար դիմորդներ չեն եղել, ապա դպրոցը կարող է իրականացնել հեռավար կրթություն:
«Մանկավարժական, ծնողական և աշակերտական խորհուրդները ՀՀ Կառավարության հաստատած կարգով կարող են ներգրավվել տվյալ ուսումնական հաստատության տնօրենի ընտրության գործընթացում: Մենք սրանով ուզում ենք մեծացնել աշակերտական խորհուրդների դերը նաև մրցույթների ժամանակ»,- ասել է Արայիկ Հարությունյանը:
Նա նշել է, որ «Տարվա լավագույն ուսուցիչ», «Տարվա լավագույն տնօրեն», «Տարվա լավագույն դաստիարակ» անվանակարգերից բացի մրցույթում կավելանան այլ անվանակարգեր: ԿԳՄՍ նախարարը տեղեկացրել է, որ կրեդիտային համակարգը ներդրվելու է միայն միջնակարգ կրթության երրորդ աստիճանում՝ 10-12-րդ դասարաններում:
