Իրանի Իսլամական Հանրապետության ղեկավար այաթոլլա Մոջթաբա Խամենեին կառավարությանը հանձնարարել է ամերիկա-իրանական հակամարտությունը կարգավորել երկխոսության միջոցով: Այս մասին, ըստ IRNA-ի, հայտարարել է Իրանի նախագահ Մասուդ Փեզեշքիանը։
«Մենք ձգտում ենք կարգավորել այդ հարցը երկխոսության միջոցով, գերագույն առաջնորդը դրա համար կառավարությանը որոշակի լիազորություններ է տվել»,- ասել է նա: Փեզեշքիանը հավելել է, որ Իրանը «պետք է հաղթահարի մարտահրավերներն ու ճգնաժամերը միասնության ու համագործակցության միջոցով»:
Ավելի վաղ Իրանի ԱԳ նախարար Աբբաս Արաղչին հույս էր հայտնել, որ Վաշինգտոնը նույնպես կընտրի հակամարտությունը լուծելու բանակցային տարբերակը։ Արաղչին նաև նշել է, որ իրանական բանակը պատրաստ է ռազմական գործողությունների վերսկսմանը։
Իրանի արտգործնախարարության խոսնակ Էսմայիլ Բաղաեին էլ հայտարարել է, որ ճգնաժամը լուծելու համար ներկայումս առկա միակ իրական նախաձեռնությունը նեղուցը բացելու յոթնօրյա ծրագիրն է, որը իրանական պատվիրակությունը ներկայացրել է Վաշինգտոնին:
Իրանական կողմի կարծիքով՝ եթե այդ ծրագիրը կյանքի կոչվի, կողմերը կարող են սկսել բանակցություններ՝ ուղղված ռազմական դիմակայություն հրահրած խնդիրների լուծմանը։
