Milanda gənclərlə polis arasında toqquşmalar davam edir. Əsasən qara geyimli maskalı iğtişaşçılar butulkalar və Molotov kokteylləri atıb, mağazaları və şəhər əmlakını, məsələn, Milan kafedralının yaxınlığındakı mərkəzi meydanın ərazisində avtobus dayanacaqlarını dağıdıblar. Polis toplaşmış kütləni dağıtmaq üçün gözyaşardıcı qaz və su şırnaqlı maşınlardan istifadə edib.
Ansa xəbər agentliyinin məlumatına görə, hüquq-mühafizə orqanları şənbə günündən bəri şimal şəhərində 200-dən çox insanı saxlayıb.
Milanda iğtişaşlar şənbə günü yaşayışın bahalaşmasına qarşı razılaşdırılmış etiraz aksiyası ilə paralel başlayıb. Oxşar hadisələr Bolonya və Turində də baş verib.
Baş nazir Corca Meloni bazar ertəsi təhlükəsizlik iclası çağırıb ki, şənbə günü Parisdə və Fransanın digər şəhərlərində baş verən xaos və talan səhnələrini xatırladan zorakılıq dalğasını müzakirə etsin. “Etiraz keçirmək hüquqdur, şəhərlərimizi məhv etmək isə yox”, — o, X-də yazıb.
Etiraz aksiyaları Portuqaliyada da keçirilib. Orada həmkarlar ittifaqları və mənzil hüquqlarının müdafiəsi ilə məşğul olan təşkilatlar maaşların artırılmasını, pensiyaların və ictimai xidmətlərin yaxşılaşdırılmasını, eləcə də mənzillərin əlçatanlığını təmin etmək üçün tədbirlər görülməsini tələb ediblər. Təşkilatçılar kirayə haqlarının, ipoteka kreditlərinin və gündəlik xərclərin artmasını ev təsərrüfatlarının büdcələrinə artan təzyiq kimi qeyd edirlər.
