ՄԵՆՔ ԲԱՑ ԵՆՔ ՀԱՅ ԳՈՐԾԸՆԿԵՐՆԵՐԻ ՀԵՏ ԵՐԿԽՈՍՈՒԹՅԱՆ ՀԱՄԱՐ. ԶԱԽԱՐՈՎԱ
ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցում անդրադառնալով Հայաստանի, Վրաստանի և Ադրբեջանի եռակողմ գործակցության ձևաչափի հնարավոր ակտիվացմանը՝ նշել է, որ ցանկացած պետություն իրավունք ունի մասնակցելու միջազգային այն ձևաչափերին, որոնք բխում են նրա շահերից և ուղղված չեն երրորդ երկրների դեմ, ինչպես նաև հաշվի են առնում ուժերի հավասարակշռությունը:
Մարիա Զախարովա (ՌԴ ԱԳՆ պաշտոնական ներկայացուցիչ) - Եթե Երևան-Թբիլիսի-Բաքու եռակողմ ձևաչափը նպաստում է Հարավային Կովկասում տարաձայնությունների կարգավորմանը, տարածաշրջանում կայունության և անվտանգության ամրապնդմանը, ապա մենք կարող ենք միայն ողջունել այդ նախաձեռնությունը: Այդ մասին բազմիցս հայտարարել ենք: Իսկ եթե այս նախաձեռնության հետևում Վաշինգտոնը և Բրյուսելն են, որոնք ձգտում են խափանել Ռուսաստանի, Հայաստանի և Ադրբեջանի ղեկավարների եռակողմ պայմանավորվածությունների կատարման ընթացքը, ապա դա այլ հարց է: Այդ եռակողմ պայմանավորվածություններն ընկած են Երևան-Բաքու հարաբերությունների կարգավորման հիմքում:
Զախարովան նաև խոսել է «3+3» տարածաշրջանային ձևաչափից, որը, նրա համոզմամբ, նույնպես միտված է տարածաշրջանում առկա տարաձայնությունների հաղթահարմանը:
«Այս ձևաչափը մեծ ներուժ ունի՝ նպաստելու հայ-ադրբեջանական կարգավորմանը»,- շեշտել է Զախարովան:
ՌԴ ԱԳՆ պաշտոնական ներկայացուցիչը նաև նշել է, որ ռուս խաղաղապահները ապահովում են Լեռնային Ղարաբաղում խաղաղությունը, ռուս սահմանապահները ներկա են նաև հայ-ադրբեջանական սահմանին: Խոսելով Հայաստանի տարածքում ԵՄ դիտորդական առաքելության տեղակայման մասին՝ Զախարովան ընդգծել է, որ Բրյուսելի նպատակը տարածաշրջանի անվտանգային համակարգը փոփոխելն է:
Մարիա Զախարովա - Մենք բաց ենք հայ գործընկերների հետ երկխոսության համար՝ քննարկելու Հարավային Կովկասում անվտանգության ապահովման մեխանիզմների կատարելագործման հարցը՝ ինչպես երկկողմ, այնպես էլ բազմակողմ ձևաչափերում, այդ թվում՝ ՀԱՊԿ շրջանակում:
Նա նաև տեղեկացրել է, որ ՌԴ ԱԳ նախարար Սերգեյ Լավրովը փետրվարի 16-ին հանդիպում կանցկացնի ԱՊՀ-ի, ՀԱՊԿ-ի, ԵԱՏՄ-ի և Միութենական պետության գործադիր կառույցների ղեկավարների հետ։ Օրակարգում կլինեն միջազգային և տարածաշրջանային հարցեր։
ՔՆՆԱՐԿՎԵԼ Է ԼՂ-ՈՒՄ ՍՏԵՂԾՎԱԾ ՀՈՒՄԱՆԻՏԱՐ ԻՐԱՎԻՃԱԿԸ
Ֆրանսիայի արտգործնախարարը և ԱՄՆ պետքարտուղարը հեռախոսազրույց են ունեցել, քննարկել ընդհանուր հետաքրքրության մի շարք հարցեր, այդ թվում՝ Հայաստան-Ադրբեջան հարաբերությունները և իրավիճակը Լեռնային Ղարաբաղում՝ հայտնում են Ֆրանսիայի արտգործնախարարությունից:
Կատրին Կոլոննան և Էնթոնի Բլինքենը գնահատել են հակամարտության կարգավորման ուղղությամբ գործադրվող ջանքերը և ընդգծել Լաչինի միջանցքով ազատ տեղաշարժի անհապաղ վերականգնման անհրաժեշտությունը: Պաշտոնյաները շեշտել են, որ շրջափակման պատճառով Լեռնային Ղարաբաղի բնակչության համար ստեղծված լուրջ մարդասիրական հետևանքներն անընդունելի են:
«Ֆրանսիան և Միացյալ Նահանգները համատեղում են ջանքերն այս իրավիճակին վերջ դնելու համար, այդ թվում՝ Հայաստանի վարչապետ Փաշինյանի և Ադրբեջանի նախագահ Ալիևի միջև շփումների միջոցով»,- ասված է հաղորդագրության մեջ։
ՔՆՆԱՐԿՎԵԼ ԵՆ ՀԱՐԱՎԱՅԻՆ ԿՈՎԿԱՍԻ ԶԱՐԳԱՑՈՒՄՆԵՐԸ
Տեղի է ունեցել ԱՄՆ պետքարտուղարի Եվրոպայի և Եվրասիայի հարցերով օգնական Քերըն Դոնֆրիդի և Ադրբեջանի արտգործնախարար Ջեյհուն Բայրամովի հեռախոսազրույցը: Կողմերը քննարկել են Հարավային Կովկասում զարգացումները, Լաչինի միջանցքի շուրջ ստեղծված իրավիճակը, ինչպես նաև Հայաստան-Ադրբեջան խաղաղության գործընթացը:
ՖՐԱՆՍԻԱՆ ԿՈՉ Է ԱՐԵԼ ՎԵՐԱԿԱՆԳՆԵԼ ԼԱՉԻՆՈՎ ԱԶԱՏ ՏԵՂԱՇԱՐԺԸ
Եվրամիության հետ համատեղ Ֆրանսիան կշարունակի ներդրում ունենալ Հայաստանի և Ադրբեջանի միջև երկխոսության կայացմանը, այդ թվում` ԵԱՀԿ շրջանակում, նման հայտարարություն արել է ԵԱՀԿ-ում Ֆրանսիայի ներկայացուցչությունը:
«Ֆրանսիան կոչ է անում Ադրբեջանին վերականգնել անցյալ տարվա դեկտեմբերի 12-ից արգելափակված Լաչինի միջանցքով տեղաշարժի ազատությունը»,- ասված է հաղորդագրության մեջ։
ԹՈՒՐՔԻԱՆ ԴԱՏԱՊԱՐՏԵԼ Է ՄԵՔՍԻԿԱՅԻ ՍԵՆԱՏԻ ԿՈՂՄԻՑ ՀԱՅՈՑ ՑԵՂԱՍՊԱՆՈՒԹՅԱՆ ՃԱՆԱՉՈՒՄԸ
Թուրքիայի ԱԳՆ-ն հայտարարություն է տարածել, բողոքել, թե փետրվարի 8-ին Մեքսիկայի Սենատում ընդունված և 1915 թվականի դեպքերը որպես ցեղասպանություն ճանաչող բանաձևը պատմությունը վերաշարադրելու անօրինական փորձ է։ Թուրքիայի արտաքին քաղաքական գերատեսչությունը պնդել է՝ Մեքսիկայի Սենատի նման որոշումը քաղաքական դրդապատճառներ ունի:
«Կոչ ենք անում Սենատին՝ թշնամանք տարածող որոշ շրջանակների օրակարգին ծառայելու փոխարեն շտկել այս սխալը»,- ասված է փաստաթղթում։
