Օդապարիկների փառատոն ԱՄՆ-ում. «Այլ լուրեր»

ԹԱԻԼԱՆԴ

ԱՅՏԵՐԻ ՓԻՐՍԻՆԳԻ ՓԱՌԱՏՈՆ

Թաիլանդի Ֆուկետ նահանգում կորոնավիրուսով պայմանավորված դադարից հետո դարձյալ անցկացվել է Այտերի փիրսինգի փառատոնը: Տեղի չինական համայնքի հավատացյալներն իրենց դեմքը ծակում են կամ տեղի սրբավայրերի մերձակայքում քայլում տաք ածուխի վրայով, որպեսզի, ըստ իրենց, մաքրագործվեն:

Այս մարդիկ նաև կարծում են, որ չինական օրացույցի իններորդ լուսնային ամսում առանց մսի, սեքսի և ալկոհոլի ապրելը նույնպես օգնում է լավ առողջության և մտքի խաղաղության հասնել:

Ֆուկետում տոնական երթ է անցկացվել` չինական աստվածների հիշատակին:

Սուր առարկաներով իրենց դեմքերը ծակած մարդիկ ասում են, որ այս փիրսինգի իմաստն այն է, որ այդպիսով ցույց են տալիս իրենց մեղսական լինելը:

Այտերի փիրսինգի փառատոնը սովորաբար տևում է 9 օր: Այն հայտնի է նաև Ինը կայսեր աստվածների փառատոն անվամբ:

ԱՄՆ

ՕԴԱՊԱՐԻԿՆԵՐԻ ՓԱՌԱՏՈՆ

Ամերիկյան Նյու Մեքսիկո նահանգի Ալբուկերկե քաղաքում անցկացվել է օդապարիկների փառատոնը: Միջազգային այս միջոցառումն անցկացվում է 50-րդ անգամ:

Փառատոնը տևում է 9 օր և սովորաբար մեկնարկում է հոկտեմբերի առաջին շաբաթվա ընթացքում:

Ամեն տարի ավելի քան 600 օդապարիկ և 700-ից ավելի օդաչու է մասնակցում այս տոնին: Կարելի է հանդիպել ինչպես ավանդական օդապարիկների, այնպես էլ տարբեր մուլտհերոսների կերպարներով օդապարիկների:

Փառատոնը հիմնադրվել է 1972 թվականին, այն ժամանակ ընդամենը 13 օդապարիկ է մասնակցել միջոցառմանը: Այսօր ամբողջ աշխարհում սա համարվում է օդապարիկներին նվիրված ամենամեծ իրադարձությունը:   

ԻՍՊԱՆԻԱ

ԻՍՊԱՆԻԱՅԻ ԱՄԵՆԱՄԵԾ ՄԱՐԴԿԱՅԻՆ ԱՇՏԱՐԱԿՆԵՐԸ 

Իսպանիան հայտնի է ոչ միայն իր խելահեղ ցլամարտերով: Հենց այն հրապարակներում, որտեղ նաև ցլամարտեր են անցկացվում, տեղի են ունենում ամենամեծ մարդկային աշտարակները կառուցելու մրցույթները: Այս դեպքում նույնպես ադրենալինի պակաս չի լինում:

Այս անգամ մրցույթը դիտելու համար մոտ 11 հազար մարդ է հավաքվել: Կատալոնական մշակույթի մեջ խորապես արմատացած մարդկային աշտարակները կամ «դղյակները» կառուցվում են միմյանց ուսերին կանգնած մարդկանց կողմից: Նրանք մրցում են թիմերով, որոնց նպատակն է կառուցել ամենաբարձր և ամենաբարդ աշտարակը:

Վիլաֆրանկայի թիմը հաղթել է 40 այլ խմբի և գրավել առաջին տեղը: Մրցանակը 16 հազար եվրո է: Այս մրցույթը տեղի է ունենում 2 տարին մեկ անգամ:

Կորոնավիրուսով պայմանավորված դադարից հետո սա տեսակի մեջ առաջին միոցառումն է Իսպանիայում: Սովորաբար թիմի ամենատարեցներն, ամուրներն ու ծանր քաշ ունեցողները կանգնում են որպես աշտարակի հիմք, իսկ ավելի թեթևները, երիտասարդներն ու ճարպիկները վերև են բարձրանում` աստիճանաբար կառուցելով մարդկային աշտարակը: Այս տարվա ամենաբարձր աշտարակը 10 մակարդակից է բաղկացած եղել:

Մարկ Մուլթեյլ (բելգիացի զբոսաշրջիկ) - Ես ֆիզկուլտուրայի ուսուցիչ եմ: Ամբողջ կյանքս սպորտով եմ զբաղվել: Սա թիմային սպորտաձև է, մարդ չի կարող միայնակ սրանով զբաղվել: Որպես մարզիչ՝ շատ լավ հասկանում եմ, թե որքան մեծ աշխատանք, ժամանակ և մարզումներ են հարկավոր նման արդյունքի հասնելու համար: Այստեղ պարտվողներ չկան, բոլոր մասնակիցներն էլ հաղթողներ են:

Իրականում սա այնքան էլ անվտանգ մրցույթ չէ: Միայն այս տարի 71 մարդ բժշկական օգնություն է ստացել, իսկ 13 հոգի տեղափոխվել է հիվանդանոց, քանի որ նման բարձրությունից ընկնելը կատակ բան չէ:  

Մարդկային աշտարակները 2010 թվականին ավելացվել են ՅՈՒՆԵՍԿՕ-ի մարդկության ոչ նյութական մշակութային ժառանգության ցանկում՝ որպես «կատալոնական մշակութային ինքնության անբաժանելի մաս», որը աշտարակը կառուցող մարդկանց համար ապահովում է «շարունակականության, սոցիալական համախմբվածության և համերաշխության զգացում»:

ԿԱՏԱՐ

ԿԱՏԱՐԸ ՎԵՐԱԲԱՑՈՒՄ Է ԻՍԼԱՄԱԿԱՆ ԱՐՎԵՍՏԻ ԹԱՆԳԱՐԱՆԸ

Իսլամական արվեստի թանգարանն իր դռներն է բացել հանրության առջև՝ 18 ամիս փակ լինելուց հետո: Ժամանակավորապես չի գործել վերագործարկման և վերատեղադրման ծրագրի պատճառով:

Թանգարանում ներկայացված է ավելի քան 11 հազար ցուցանմուշ: Դրանք վերցված են երեք մայրցամաքից և 13 դարի պատկանող առարկաներ են: Ներառում են իսլամական արվեստի հավաքածուներ ամբողջ աշխարհից:

Ջուլիա Գոնելա (Կատարի թանգարանի տնօրեն) - Պետք է ասեմ, որ այս թանգարանը ապշեցուցիչ ճարտարապետություն ունի: Այն կանգնած է հին և նոր Դոհաների միջև՝ կապելով անցյալը ներկայի հետ: Կարծում եմ, որ դա իդեալական վայր է Իսլամական աշխարհը ցուցադրելու այլ տեսանկյունից, քան ջիհադը և նահատակները, պատերազմն ու խնդիրները:

Կատարն ունի 2.8 միլիոն բնակչություն: Նրանցից ընդամենը 380 հազարն են Կատարի քաղաքացիներ: Բոլորովին էլ պատահական չէ թանգարանի վերաբացումը հենց այս ժամանակաշրջանում, քանի որ տարեվերջին Կատարը պատրաստվում է հյուրընկալել ՖԻՖԱ-ի Աշխարհի գավաթի խաղերը: Երկրի իշխանությունների հավաստմամբ, ակնկալվում է, որ այդ միջոցառումը Կատար կբերի ավելի քան մեկ միլիոն երկրպագուի:

ՄԵԾ ԲՐԻՏԱՆԻԱ

ՍՈՒՊԵՐՄԵՆԻ ԿՈՍՏՅՈՒՄԻՑ ՄԻՆՉԵՎ ՍՈՒՊԵՐ ԱՍՏՂԵՐԻ ԿԻԹԱՌՆԵՐ. ԱՃՈՒՐԴ ԼՈՆԴՈՆՈՒՄ

Ֆիլմերից, հեռուստատեսությունից և երաժշտության աշխարհից հայտնի և ծանոթ իրերը կվաճառվեն նոյեմբերին, երբ բրիտանական Propstore հուշանվերների ընկերությունը կանցկացնի իր ամենամյա աճուրդը Լոնդոնում:

Քանի որ երկու տարի կորոնավիրուսի համաճարակի պատճառով աճուրդ չի անցկացվել, այս անգամ ներկայացված տեսականին բավականին մեծ է և բազմազան: Ներկայացված է ավելի քան 1500 լոտ՝ 11 միլիոն ֆունտ ընդհանուր արժեքով:

Սթիվեն Լեյն (Propstore-ի գործադիր տնօրեն) - Այս տարի ավելի մեծ աճուրդ է լինելու, քան նախկինում: Լոտերի քանակն առնվազն 500-ով ավելի է: Ահա թե ինչու աճուրդը մեկ օր ավելի կտևի: Սա բավականին մեծ քայլ է մեզ համար, այն մեր միջոցառումն ավելի հետաքրքիր է դարձնում:

Վաճառքի կարևորագույն լոտերից է Սուպերմենի ամբողջական զգեստը, որը Քրիստոֆեր Ռիվը կրել է 1978-1987 թվականներին «Սուպերմեն» ֆիլմաշարում: Այն գնահատված է 250- 500 հազար ֆունտ ստեռլինգ: Դարտ Վեյդերի սև ձեռնոցները 1977 թվականի «Աստղային պատերազմներ. նոր հույս» ֆիլմից են, գնահատված են 150-250 հազար ֆունտ ստեռլինգ, իսկ Rockhammer Աստվածաշունչը 1994 թվականի արտադրության «Փախուստ Շոուշենկից» ֆիլմից է, գնահատված է 100-150 հազար ֆունտ ստեռլինգ:

Մեծ վաճառքի հանված մյուս իրերից են 2001 թվականին «Հարի Փոթերը և փիլիսոփայական քարը» ստեղծագործության առաջին հրատարակությունը, որը գնահատված է 100-150 հազար ֆունտ ստեռլինգ, Նելիի օդաչուի սաղավարտը, որը Շոն Քոնորին կրել է 1967 թվականին, «Ջեյմս Բոնդ. դու միայն երկու անգամ ես ապրում» ֆիլմում, արժեքը 60-100 հազար ֆունտ ստեռլինգ է:

Երաժշտասերները նույնպես հնարավորություն կունենան գնելու այնպիսի ապրանքներ, ինչպիսիք են Դեյվիդ Բոուիի Major Tom տիեզերանավը Ashes to Ashes տեսահոլովակից, որը գնահատված է 60-80 հազար ֆունտ ստեռլինգ, Էլվիս Փրեսլիի ստորագրությամբ՝ զենքի լիցենզիայի դիմումը, որի արժեքը 40-60 ֆունտ ստեռլինգ է, և էլի բազում թանկարժեք լոտեր:  

ՀՈՆԿՈՆԳ

ՊԻԿԱՍՈՅԻ ՆԿԱՐԸ ՀԱՆՎԵԼ Է ԱՃՈՒՐԴԻ

Արվեստասերները, հավաքորդներն ու լրատվամիջոցները ականատես են եղել, թե ինչպես է «Սոթբիի» Հոնկոնգյան Աշնանային մեծ վաճառքի շրջանակում աճուրդի հանվել Պիկասոյի մեծ կտավներից մեկը և արվեստի այլ գործեր:

Աճուրդի հանված գլխավոր նմուշը Պիկասոյի երկրորդ կնոջ՝ Ժակլին Ռոկի դիմանկարն է: Այն գնահատված է 7.7-10 միլիոն դոլար: Ավելի քան 50 տարի մասնավոր հավաքածուում լինելուց հետո առաջին անգամ է այս կտավը հանվում մեծ վաճառքի:

Ռիշիկա ասոմուլ («Սոթբի» աճուրդի տան աշխատակից) - Այս կտավը եղել է ընտանեկան հավաքածուում 1960-ականների վերջից, քանի որ այն վերջին անգամ ձեռք է բերվել այդ ժամանակ: Համարվում է ընտանեկան ժառանգություն և ներառված է եղել շվեյցարական մասնավոր հավաքածուում: Առաջին անգամ է հայտնվում աճուրդում: Այն տասնամյակներ շարունակ, ավելի ճիշտ՝ կես դար, հեռու է եղել հասարակության աչքից:

Աճուրդի հանված թանկարժեք լոտերի թվում են նաև գերմանացի նկարիչ Գերհարդ Ռիխտերի կտավներից մեկը և ավելի քան 11 կարատանոց վարդագույն ադամանդով շքեղ մատանին:

ԵԳԻՊՏՈՍ

ԵԳԻՊՏԱԿԱՆ ​​ԱՐՎԵՍՏԻ ՓԱՌԱՏՈՆ ԿԻՆ ԱՐՎԵՍՏԱԳԵՏՆԵՐԻ ՀԱՄԱՐ

Կահիրեում միայն կանանց համար նախատեսված փառատոնն իր դռներն է բացել հանդիսատեսի առաջ՝ նպատակ ունենալով ուշադրություն դարձնել կին արտիստներին և օգնել նրանց՝ ձեռք բերելու ավելի մեծ թվով երկրպագուների:

Փառատոնը, որ կոչվում է She Art, միավորել է արաբ արտիստներին օտարերկրացիների հետ: Նրանք գործակցում են երաժշտության, թատրոնի, ստենդ-ափ կատակերգության և կինոյի ոլորտներում:

Մագդալենա Քլեյն (նվագախմբի դիրիժոր գերմանիայից) - Կարծում եմ՝ այս փառատոնը հրաշալի գաղափար է: Այն կարող է խթանել կանանց դերը արվեստում: Շատերը կան, որոնք հիանալի և տաղանդավոր են, բայց միշտ չէ, որ նրանք այնքան մեծ գնահատականի են արժանանում և հանրահռչակվում, որքան տղամարդիկ:

Փառատոնը նաև օգնում է բացահայտելու նոր աստղերի, որոնք հենց այս միջոցառման շնորհիվ հայտնի են դառնում և հետագայում տարբեր միջոցառումների մասնակցելու հրավերներ են ստանում:

ԱՄՆ

ԴԴՈՒՄ ՓՈՐԱԳՐԵԼՈՒ ՓԱՌԱՏՈՆ ԼՈՍ ԱՆՋԵԼԵՍՈՒՄ

Հելոուինի տոնին ընդառաջ Լոս Անջելեսում անցկացվել է Դդումներ փորագրելու փառատոնը: Այս տարի որոշել են փորագրված դդումների վրա պատկերել բոլոր այն հայտնի դեմքերին, որոնք կյանքից հեռացել են 2022 թվականի ընթացքում: Նրանց թվում են Բեթի Ուայթը, Օլիվիա Նյուտոն-Ջոնը և, իհարկե, Մեծ Բրիտանիայի Եղիսաբեթ 2-րդ թագուհին:

Սա մի միջոցառում է, որին մեծ հաճույքով այցելում են ինչպես երեխաները, այնպես էլ նրանց ծնողները: Մարդիկ սիրում են ընտանիքներով գալ այստեղ և հիանալ հասարակ դդումներից պատրաստված գլուխգործոցներով:

Միքայելա Սանչես (Դդումներ փորագրելու փառատոնի այցելու) - Անչափ գեղեցիկ է ամեն ինչ: Իրականում մենք ցերեկն ենք գալիս այստեղ: Սակայն մնում ենք մինչև ուշ երեկո: Գիշերն ամեն ինչ ավելի վառ է ու տպավորիչ: Դուստրերիս հետ այստեղ եմ եկել իմ ծննդյան տարեդարձը նշելու:

Փառատոնի շրջանակում ոչ միայն ցուցադրվում են արդեն պատրաստի աշխատանքներ, այլև այցելուներին հատուկ ստուդիայում ցույց են տալիս, թե ինչպես են փորագրում և պատրաստում դդումից ստեղծված հիասքանչ լապտերները: