Մենք միշտ հանդես ենք եկել համազգային համերաշխության դիրքերից. Կոնջորյանի պատասխանը նախկին նախագահներին

Ազգային ժողովի «Քաղաքացիական պայմանագիր» խմբակցության ղեկավար Հայկ Կոնջորյանն արձագանքել է Հայաստանի առաջին նախագահ Լևոն Տեր-Պետրոսյանի՝ նախկին նախագահների և իշխանության կոնսոլիդացիայի կոչին՝ նշելով, իշխանությունը կողմ է առաջարկին:

«Մենք մշտապես հանդես ենք եկել համազգային համերաշխության և միասնականության դիրքերից, գտել և գտնում ենք նաև հիմա, որ Հայաստանի շուրջ ստեղծված մարտահրավերները պահանջում են, որպեսզի մենք մեր բոլոր ուժերը կենտրոնացնենք և կարողանանք պատասխանել այդ մարտահրավերներին պատշաճ կերպով: Մենք՝ որպես իշխանություն, անում ենք մեր առավելագույնը և մշտապես պատրաստ ենք եղել նաև թե՛ խորհրդարանական ընդդիմության, թե՛ արտախորհրդարանական, թե՛ քաղաքացիական հասարակության ներկայացուցիչների հետ ևս միասնական ջանքեր գործադրել այդ նպատակների իրագործման համար»,- ասաց նա:

Կոնջորյանը նշեց, որ վարչապետը քանիցս խորհրդարանական ընդդիմությանն առաջարկել է հանդիպել, ներկայացնել այն հարցերի պատասխանները, որոնք հուզում են ընդդիմությանը, բայց, նրա խոսքով՝ խորհրդարանական ընդդիմությունը մերժել է հանդիպելու առաջարկը:

«Համոզմունք ունեմ, որ այդ մերժման հիմքում դրված է այն, որ խորհրդարանական ընդդիմությունը վախենում է պատասխանատվությունից, որովհետև տիրապետել տեղեկատվության՝ նշանակում է նաև վերցնել այդ տեղեկությունն իմանալու  պատասխանատվությունը: Եթե դու իմանում ես այդ տեղեկատվությունը, դրանից հետո դժվար է լինելու դուրս գալ փողոց և խոսել իրականության հետ կապ չունեցող, երևակայական և դավադրապաշտական թեզերի մասին»,- ասաց նա:

Հեղինակ՝ Նիկոլայ Ավետիսյան