Պետպատվերի գումարը սպառվել է՝ 2021-ի աշնանը բազմաթիվ քաղաքացիներ ահազանգում էին, որ բժշկական կենտրոններում այսպիսի պատասխան են ստանում: Վարչապետի հանձնարարականով Պետական վերահսկողական ծառայությունը սկսել է ուսումնասիրություն առողջապահության նախարարությունում՝ հենց այս հարցով. պետական առողջապահական գործակալությունում իրականացվող ուսումնասիրություններին զուգահեռ ստուգումները մեկնարկել են նաև պետական պատվերի մեծ մասնաբաժին ունեցող մեկ տասնյակ խոշոր ԲԿ-ներում:
Ռոմանոս Պետրոսյան (Պետական վերահսկողական ծառայության պետ) - Երրորդում ուսումնասիրությունները ամփոփման փուլում են, մնացածում շարունակվում են կամ նոր են մեկնարկելու:
Թե կոնկրետ որ բժշկական կենտրոններում են արձանագրվել խախտումներ՝ Պետրոսյանը դեռ չի մանրամասնում. դեռ գործընթացը չի ավարտվել, որ ավելին ասեմ:
Վարչապետի կողմի հստակ հանձնարարարակններ կհետևեն ղեկավարներին
Ոլորտում համալիր բարեփոխումների անհրաժեշտություն կա, օրենսդրական բացն է հաճախ դառնում խախտումների պատճառ՝ կարծում է ՊՎԾ ղեկավարը, ներկայացնում ամենատարածվածները. երբ բաց դաշտ է ստեղծվում որոշակի անբարեխիղճ սուբյեկտների որոշումների ուղղությամբ:
Խոսքն այնպիսի դեպքերի մասին է, երբ պետությունը հոգում է ծախսը, փոխհատուցում է կոնկրետ բուժհաստատությանը կոնկրետ մարդու հիվանդության դեպքում, բայց կան սուբյեկտներ, կրկնակի գանձումներ են անում:
Մի մասի դեպքում արդեն կրկնակի գանձած գումարը վերադարձվել է բյուջե: Եղել են դեպքեր, երբ գումարը վերադարձվել է քաղաքացուն:
Բուժհաստատությունը կապվում է քաղաքացու հետ, ներկայացնում իրավիճակը, որ ձեր կողմից գանձնված վիճակը ենթակա է վերադարձի, տասնյակ դեպքեր են եղել:
Խախտումների մյուս մեծ չափաբաժինը կանխամտածված մեքենայություններն են, երբ պացիենտին անհրաժեշտ բուժօգնությունը պետպատվեր չի ենթադրում, բայց բուժաշխատողը ԱՐՄԵԴ համակարգում գրանցում է կեղծ տվյալներ՝ հիվանդություն, որի բուժումը պետպատվերի շրջանակում է, ու այդպիսով հիվանդանոցը գումար է ստանում բյուջեից. ունենք արդեն մի քանի քրեական գործեր հարուցված:
Շատ են նաև դեպքերը, երբ տեսնելով, որ հիվանդը վճարունակ է՝ օրենքով նախատեսված պետպատվերը չեն գրանցում՝ թողնելով այն, օրինակ՝ իրենց ծանոթին:
Պետական բյուջեից տրամադրվող պետպատվերի գումարները բավարար են կոնկրետ սոցիալական կարգավիճակ ունեցող քաղաքացիների բուժսպասարկումը իրականացումը համար, պետպատվերի հետ կապված խնդիր չպիտի լինի, եթե բժշկական ծառայությունները, գերատեսչության պատասխանատուները և առաջնակի օղակի բուժհաստատությունները բարեխղճորեն իրականացնեն իրենց պարտավորությունները պետության ու քաղաքացու նկատմամբ:
Վերջին տարիներին, ըստ առողջապահության նախարարության տվյալի, պետպատվերի միջոցներն աճել են: Չնայած 2018-ին, 2017-ի համեմատ, նախատեսված գումարը փոքր-ինչ նվազել է, 2019-ին ավելացել է ավելի քան 18 մլրդ դրամով՝ կազմելով 84,7 մլրդ, 2020-ին՝ 92, 5 մլրդ, 2021-ին պետպատվերի համար հատկացվող բյուջեն հատել է 100 միլիարդի շեմը: Այս տարվա տվյալները դեռ ամփոփված չեն:
Հեղինակ՝ Իրինա Մկրտչյան
