Կենսաթոշակի բարձրացումը կկազմի առնվազն 3000 դրամ. Կառավարությունը լրացուցիչ որոշում կայացրեց
97 000 ՇԱՀԱՌՈՒԻ ԿԵՆՍԱԹՈՇԱԿՆ ՈՒ ՆՊԱՍՏԸ ԲԱՐՁՐԱՑԵԼ ԵՆ
Կառավարությունը վերանայեց նվազագույն կենսաթոշակի չափը՝ այն սահմանելով 31 հազար 600 դրամ՝ 30 500-ի փոխարեն: Հարցը թեև չզեկուցվողների շարքում էր, նիստը վարող փոխվարչապետը ոլորտային նախարարին խնդրեց ներկայացնել մանրամասները: Մկրտչյանը նկատեց՝ այս որոշմամբ բացառապես բոլորի թոշակները կբարձրանան առնվազն 3000 դրամով: Նախագիծն օրակարգ է բերվել վարչապետի հանձնարարականով, քանի որ օգոստոսի 24-ին արված վերանայումից հետո պարզվել էր՝ գործող օրենքով թոշակառուների մի մասի համար ավելացումը խոստացված 3000-ից պակաս է կազմում:
Նարեկ Մկրտչյան (ՀՀ աշխատանքի և սոցիալական հարցերի նախարար) - Նախագծի ընդունման արդյունքում 16 հազար 600 կենսաթոշակառուի և 5186 զինկենսաթոշակառուի ու շուրջ 75 հազար նպաստառուի համար սեպտեմբերի 1-ից կավելանան կենսաթոշակն ու նպաստները: Այսինքն՝ մինչև այս որոշումը այն խումբը, որոնց թոշակը մինչև այս որոշումը սահմանված օրենքով և բանաձևով բարձրացել էր 1900 կամ 2500 դրամով, այդ մնացած հատվածը հոկտեմբերի կենսաթոշակի հետ կստանա:
Այսպիսով՝ սեպտեմբերի 1-ից կենսաթոշակի ու նպաստի առնվազն 3000 դրամով բարձրացումը կտարածվի ևս 97 հազար շահառուի վրա: Հասարակության այս խմբի համար նախարարը ևս մեկ լավ նորություն ուներ. թոշակների ու նպաստների հետվճարի համակարգին միացել է ԱԿԲԱ բանկը:
Նարեկ Մկրտչյան - Հորդորում եմ մեր քաղաքացիներին, որ արդեն ակտիվորեն անկանխիկ գործարքներ անեն նաև ԱԿԲԱ բանկի քարտերով, որովհետև կենսաթոշակառուների բավականին մեծ հատված սպասարկվում էր հենց ԱԿԲԱ-ի կողմից:
693 ՄԼՆ ԴՐԱՄ՝ 6 ՄԱՐԶԻ ՍՈՒԲՎԵՆՑԻՈՆ ԾՐԱԳՐԵՐԻ ՀԱՄԱՐ
Անցնելով զեկուցվող հարցերին` 693 միլիոն դրամ ուղղվեց 6 մարզի 11 բնակավայրի 15 սուբվենցիոն ծրագրի: Դրանց մի մասն ավարտվել է, մնացածն էլ ավարտական փուլում է՝ զեկուցեց Գնել Սանոսյանը:
Գնել Սանոսյան (ՀՀ տարածքային կառավարման և ենթակառուցվածքների նախարար) - Արարատի մարզում մեկ ծրագիր է՝ 71 մլն դրամ արժողությամբ, Գեղարքունիքում՝ 3 ծրագիր՝ 70 մլն դրամ, Լոռու մարզում՝ մեկ ծրագիր՝ 23 մլն դրամ, Շիրակում մեկ ծրագիր՝ 29 մլն դրամ, Սյունիքի մարզում՝ 4 ծրագիր՝ 353 մլն դրամ և Վայոց ձորում 5 ծրագիր՝ 145 մլն դրամ:
Այս հատկացումն էլ հետը հաշված՝ տարեսկզբից մինչև հիմա գործադիրը 303 սուբվենցիոն ծրագրի 8 միլիարդ 758 միլիոն դրամ է հատկացրել՝ թվերն ամփոփեց նախարարը: Փոխվարչապետը հետաքրքրվեց՝ իսկ ի՞նչ ընթացքի մեջ են 2023-ի հայտերը: Դրանք արդեն քննարկվում են, որ հաջորդ տարի շինարարությունը գարնանից սկսվի, գործը չկանգնի՝ ասաց Սանոսյանը: Ըստ նրա՝ նախագծերի ներկայացման համար համայնքներն այժմ չորսամսյա ժամկետ ունեն, նախատեսում են դեկտեմբերից ամփոփել արդյունքները:
Գնել Սանոսյան - Ունենք բավական մեծ թվով հայտեր, ընդհանուր առմամբ 112 միլիարդ դրամի, որն աննախադեպ մեծ է:
Նախագծերը կազմելու ընթացքում այս թիվը դեռ կփոփոխվի՝ ասաց Սանոսյանը: Այդպես եղավ նաև 22-ի դեպքում, նախնական հայտերը 377-ն էին, հաստատվեց 363՝ 74.5 միլիարդ դրամ արժեքով, որից 39 միլիարդը Կառավարության մասնաբաժինն է:
ՆՈՐ ՊԱՀԱՆՋՆԵՐ ՄԵՔԵՆԱՆԵՐԻ ԱՌՔՈՒՎԱՃԱՌՔԻ ՇՈՒԿԱՅԻ ՀԱՄԱՐ
Մեկ այլ նախագծով Կառավարությունը նոր պահանջներ սահմանեց մեքենաների առքուվաճառքի շուկաների համար: Ըստ Գնել Սանոսյանի՝ ուսումնասիրել են գործընկեր երկրների փորձը, նաև հարևան Վրաստանի ու քաղաքակիրթ շուկայի մասին պատկերացումները շարադրել որոշման մեջ:
Գնել Սանոսյան - Դրա համար սահմանվել են տարրական չափորոշիչներ՝ սկսած շուկայի տարածքից, չափից, որը սահմանվել է 5 հեկտար: Սահմանվել է, որ այնտեղ պետք է լինեն բազմաթիվ ծառայություններ՝ և՛ ֆինանսական, և՛ ոստիկանական, և՛ մաքսային, որպեսզի այդ շուկայում ոչ միայն մեքենա գնել, վաճառել հնարավոր լինի, այլ նաև հնարավոր լինի մաքսազերծել այն, տեղում հաշվառում իրականացնել, պետհամարանիշներ ստանալ:
Շուկա այցելողների համար էլ առանձին ավտոկայանատեղի կլինի, տարածքում՝ սննդի կետեր՝ թվարկեց նախարարը: Համբարձում Մաթևոսյանն էլ հույս հայտնեց՝ նոր մոդելը կթեթևացնի նաև ոստիկանության համապատասխան ստորաբաժանման գերծանրաբեռնվածությունը:
