Նորոգվում են Մարտունու հանրապետական ու միջպետական ճանապարհները

Արդեն մի շաբաթ է՝ Մարտունու Սայաթ-Նովայի փողոցի բնակիչները տարբերվող զարթուցիչ ունեն: Առավոտյան 7-ին արթնանում են մեկնարկող շինաշխատանքի ձայնից:

Ճանապարհը շահագործման կհանձնվի տարվա վերջին: 

Կառավարությունը 2.5 կմ երկարությամբ ճանապարհի հիմնանորոգման համար 530 մլն դրամ է տրամադրել: Այն Մ10 միջպետականը շրջանցող ճանապարհն է:

Շանթ Ղուկասյան («Շանթ-Սեյրան» ՍՊԸ կազմակերպության գլխավոր ինժեներ) - Նախատեսված է կառուցել նոր կոյուղի, ջրահեռացման վաքեր, մայթեր և երթևեկելի մաս: Այս պահին կառուցվում է կոյուղագիծը, որից հետո կտանք տնային միացումները, այնուհետև՝ ջրահեռացումն ու մայթերը:

Շինարարության ընթացքին հետևելու էր եկել ՏԿԵ նախարար Գնել Սանոսյանը:

Հաջորդ կանգառը Մ11 Մարտունի-Վարդենիս միջպետական ճանապարհն էր, որտեղ շինարարական ակտիվ եռուզեռ է մայիսի կեսից:

Շանթ Ղուկասյան - Նախատեսված է հիմնանորոգվել Մ11 միջպետական Մարտունի-Վարդենիս ճանապարհի 0-5.9 կմ հատվածը, որից 1 կմ-ն կառուցվել է 2021-ին, մնացած 4.9 կմ նախատեսված է մինչև 2022-ի ավարտը: Չնայած աշխատանքների ճիշտ կազմակերպման արդյունքում աշխատանքների ավարտը նախատեսել ենք հուլիսի ընթացքում:

Իրենց խոսքով՝ ճանապարհի 60 տոկոսից ավելին արդեն ասֆալտապատված է, 80 տոկոսից ավելին՝ նոր հիմք ունի: 

Շանթ Ղուկասյան - Մեր ընկերությունը հանդիսանում է տվյալ ճանապարհը սպասարկող ընկերություն, ինչն ավելի շահագրգիռ է դարձնում աշխատանքները կատարել ավելի բարձր որակով:

Շինաշխատանքների որակին հետևեց, ճանապարհի հիմքի մասով որոշակի դիտարկումներ արեց նախարար Գնել Սանոսյանը: Մարտունի-Վարդենիս այս ճանապարհահատվածի հիմնանորոգման համար պետբյուջեից 732 մլն դրամ է հատկացվել:

Գնել Սանոսյան (ՀՀ ՏԿԵ նախարար) - Ունենք հանձնարարություն և նպատակ Սևանի շուրջ ամբողջ ճանապարհահատվածն ունենալ բարձրակարգ ճանապարհ, և այս հատվածն էլ այդ կտորի մեջ է:

Գեղարքունիքում եղանակի պատճառով աշխատանքներն ավելի ուշ են սկսվում, քան մյուս մարզերում, բայց նախարարը վստահ է՝ սահմանված ժամկետում կավարտեն:

Գնել Սանոսյան - Սևանի շուրջ գտնվող ճանապարհահատվածում երկու խոշոր կտոր ունենք, մեկը սա է, մյուսը՝ Սևանից դեպի Լճափ հատվածը: Ունենք Մարտունիում, Գավառում աշխատանքներ, դեպի Վայոց ձոր հատվածում աշխատանքներ, մյուսները նախագծման փուլում են կամ ավելի փոքր տեղական ճանապարհներ են:

Նախարարը նշում է՝ նպատակ ունի բոլոր շինաշխատանքներին անձամբ հետևելու: Շեշտում է՝ պետությունը շահագրգռված է, ոչ միայն բարեկարգել ենթակառուցվածքները, այլև երաշխավորել դրանց երկարատև և որակով շահագործումը: