Լալա Պողոսյան (Երևանի պետական տեխնոլոգիական քոլեջի խոհարար-մասնագետ) - Եզան լեզվի տոլմա, սև թթի տերևով, վարդի թերթիկներով...
Նաև կանեփով, պասուց և սուտի տոլմա՝ լցոնած նռան կեղևի մեջ կամ փաթաթած բուժիչ խոտաբույսերով: Զվարթնոց պատմամշակութային արգելոց-թանգարանում կայացած տոլմայի փառատոնին Երևանի պետական տեխնոլոգիական քոլեջը 12 տեսակի տոլմա էր ներկայացրել: Իսկ մրցանակայինը Վահագնագորգի պատկերով տոլման էր, որում ներառել էին բոլոր 12 տեսակները:
Լալա Պողոսյան - Պատկերով հավաքել ենք:
Փառատոնն անցկացվում էր 11-րդ անգամ, մասնակցում էր 27 կազմակերպություն՝ բոլոր մարզերից: Համեղ սնվելու սիրահարները ճաշակեցին ձկով, կարտոֆիլով, սնկով, թարմ ու չոր մրգերով տոլմա՝ 70 տեսակի: Ոմանք եփում էին տեղում, ոմանք էլ մատուցում եփած-պատրաստած վիճակում՝ հերմետիկ փակված կավե ամաններով:
Հմայակ Բաբայան (խոհարար) - Հնում օգտագործվել է արքայական ընդունելությունների ժամանակ, զմռսված է խմորով, բացվում է սեղանի վրա:
Վլադիմիր Ռաֆայելյան (ավագ խոհարար) - Քաշովի տոլմա է, այսքան ժամանակ ոչ ոք չի պատրաստել, քաշովի փլավ է՝ տոլմայի հետ:
«Լավագույն գաղափար», «Լավագույն տեսք», «Լավագույն համ» և «Լավագույն տաղավար» անվանակարգերի համար մրցում էին ռեստորանները, սպասարկման ոլորտի ներկայացուցիչներն ու վարպետության դասեր իրականացնող 7 կազմակերպություն: Լավագույններին ընտրում էր ժյուրին:
Սեդրակ Մամուլյան («Հայ խոհարարական ավանդույթների զարգացման և պահպանման» հկ նախագահ) - Խոհարարությունը համի հետ կապ ունի, խոհարարը համի ճարտարապետն է, իսկ տեսքը ճաշակողինն է: Խոհարարությունը մտքի թռիչքի արդյունք է:
Փառատոնը կարևոր է Հայաստանի պատմամշակութային ժառանգության պահպանման ու հանրահռչակման, ինչպես նաև տնտեսական աճի խթանման համար՝ ասում են մասնագետները: Հետաքրքրությունը մեծ է հատկապես զբոսաշրջային ոլորտում: Ըստ կազմակերպիչների՝ համավարակից ու պատերազմից հետո այսօրինակ միջոցառումներ կազմակերպելը նաև աշխարհին ուղղված խոսք է:
Մեխակ Ապրեսյան (Տուրիզմի հայկական ֆեդերացիայի նախագահ) - Տեսեք՝ բազմաթիվ զբոսաշրջիկներ երջանիկ, անվտանգ ման են գալիս: Մենք չենք հայտարարում՝ անվտանգ ենք, եկեք, մենք նրբորեն ցույց ենք տալիս: Զբոսաշրջիկները պետք է ընտրեն՝ գնան Բրազիլիա կառնավալի՞ն մասնակցեն, թե՞ գան Հայաստան՝ տոլմայի, գինու և այլ փառատոնի:
Փառատոնի զարդը 190 մետրանոց տոլման էր: Պատրաստման համար մոտ 20 կգ խաղողի տերև, 45 կգ միս, 30 կգ բրինձ են օգտագործել: 5 հոգով 2 օր ու գիշեր աշխատել են, որ հասցնեն:
Նիկոլայ Բալյան (ավագ խոհարար) - Շուտ չէինք կարող պատրաստել, որովհետև պահելու խնդիր կար, եփել ենք ու բերել ենք:
11-րդ փառատոնն առանձնացավ տեղում կազմակերպված վարպետության դասերով: Այն նաև զվարճանալու և լիցքաթափվելու հնարավորություն էր, հատկապես օտարերկրյա զբոսաշրջիկների համար:
