Պետական եկամուտների կոմիտեի ուսումնական կենտրոնում մեկնարկել է մաքսային ծառայողի պատրաստաման դասընթացը: Մինչ այդ դասընթացի մասնակցության ընդունելության և ավարտական փուլի գործընթացն էր, որը սկսվել էր դեռևս փետրվարից: Դիմել էր 1989 քաղաքացի։ Բարեվարքության ստուգատեսին հրավիրվել էր 721 դիմորդ, մնացած հայտերը մերժվել էին տարբեր պատճառներով: Այժմ դասընթացին մասնակցում է շուրջ 250 դիմորդ, ովքեր հաղթահարել են օտար լեզվի, համակարգչային, մասնագիտական հարցաշարերի թեստավորման և հարցազրույցի փուլերը:
Դասընթացի ժամանակ մասնակիցները կպատրաստվեն մաքսային ծառայության տարբեր պաշտոններում աշխատելու համար։ Դասընթացը կազմված է երկու փուլից՝ տեսական և գործնական։ Տեսական մասը կտևի 30-95 դասաժամ՝ ըստ պաշտոնի: Դասընթացում ընդգրկվածները կուսումնասիրեն մաքսային գործի առանձնահատկությունները, հաճախորդների սպասարկման, բարեվարքության, հոգեբանության հիմունքները և այլն: Մասնակիցների առաջխաղացումը գնահատվելու է թեստավորման միջոցով՝ յուրաքանչյուր շաբաթ, և ստացված միջինացված գնահատականները կօգտագործվեն վարկանիշային միավորները հաշվարկելիս: Տեսական մասին կհաջորդեն գործնական պարապմունքները՝ մինչև 10 շաբաթ։ Ապագա մաքսային ծառայողները մասնակցելու են մաքսային գործառույթների իրականացմանն այն ստորաբաժանումներում, որտեղ նախատեսվում է իրականանցնել հաստիքների համալրում։
Ուսումնառության բոլոր փուլերում գործելու է մասնակիցների առաջադիմության, պատասխանատվության գնահատման բավական խիստ և բազմաշերտ մեխանիզմ։ Ավելի բարձր վարկանիշային միավորներ հավաքած դիմորդները կհրավիրվեն հարցազրույցի և լավագույնները կնշանակվեն համապատասխան պաշտոնների, մասնավորապես, վերակազմավորված՝ Երևանի մաքսային սպասարկման կենտրոն-մաքսատուն, վարչությունում, ինչպես նաև կստանան հավաստագիր՝ 3 տարի ժամկետով:
