Առաջին անգամ Թումանյանի 10 հազար միավոր գրքեր ներառող անձնական գրադարանի դռները բացվել են այցելուների առջև: Այս գրադարանը, որ խորհրդանշում է մեծ պոետի պաշտամունքը գրքի հանդեպ, զարմանալի պատմություն ունի: Թումանյանն այն սկսել է հավաքել՝ ձեռքի տակ ունենալով միայն Աբովյանի «Վերք Հայաստանին» և կուտակել է մի ահռելի հարստություն, որն իր տասնմեկերորդ զավակն էր համարում:
Այս տարի «Գիրքը՝ ծննդյան նվեր. Չարենց-Թումանյան» խորագրի ներքո երևանյան երկու՝ Չարենցի և Թումանյանի տուն-թանգարանները համատեղ ցուցադրությամբ են նշանավորում Թումանյանի ծննդյան օրը, Չարենցի 125-ամյակն ու գիրք նվիրելու տոնը:
Ի՞նչն էր կապում հայ պոետիկ մտքի երկու հանճարներին, եթե նրանք անգամ մեկ հանդիպում չեն ունցել: «Նորերից Չարենցն է, որ անպայման բանաստեղծ է, տաղանդավոր տղա է»՝ Թումանյանի գնահատականն է Չարենցին: Եվ ցուցադրական նյութն էլ Չարենց-Թումանյան հոգևոր եղբայրության ու հարազատության լավագույն վկայությունն է:
Ցուցադրության կարևոր հատվածն առնչվում է Թումանյան-ազգային երաժշտություն թեմային: Այն իրողությունը, թե քանի մեծ երաժիշտների ու երգահանների է ոգեշնչել Թումանյանի պոեզիան, տպավորիչ թվեր է ներկայացնում՝ 130 երաժշտական գործ՝ «Անուշ» օպերայից մինչև Կոմիտասի ստեղծագործությունները, և այս ցանկը չի ներառում վերջին մի քանի տարիներին ստեղծված գործերը:
Իսկ թումանյանական տոնն արդեն ավանդույթի ուժով օրվա սկզբից մինչև ուշ երեկո թանգարանում է համախմբում բոլոր տարիքի գրքասերներին՝ գրքի հանդեպ սերն ու կարդալու մշակույթը վերածելով ազգային արժեհամակարգի:
