Հալեպահայ երիտասարդների վերապատրաստման և արհեստներ սովորեցնելու հետևողական ծրագիր

Անցնող տասը տարիներու Սուրիոյ պատերազմը ամէնէն աւելի իր կործանիչ ազդեցութիւնը ունեցաւ երիտասարդներուն վրայ: Կեանքի ներուժ հայթայթող անոնց ապագայ երազները դարձան աղօտ և յոյսը հետզհետէ սկսաւ նուազիլ: Այս կացութեան մէջ մտայղացում ունեցաւ Հալէպի Հայ Աւետարանական Համայնքը երբ Սուրիոյ մակարդակին որակեալ ու արհեստավարժ ուսումնարաններու հետ համագործակցաբար` նախաձեռնեց երիտասարդներու արհեստներ սորվեցնելու ծրագրին:

Երիտասարդութեան վերապատրաստման այս ծրագիրը կ՛ընդգրկէ խոհարարական, նկարչական, տեսանիւթերու բեմադրման, ձևագիտութեան, համակարգչային ծրագրաւորումներու և բջիջային հեռախօսներու նորոգութեան դասընթացքներ:

Դոկտ. Հարություն Սելիմյան (Սիրիայի հայ ավետարանական համայնքի ղեկավար) - Երիտասարդական մասնագիտական վերապատրաստման ծրագիրը 2018 թուականէն ծնունդ առաւ և իւրաքանչիւր տարի շուրջ 200 երիտասարդներ մասնակցեցան այս ծրագիրին: Այս ծրագիրները աւարտելէ ետք կը կատարուի յատուկ արժևորում, որմէ ետք անոնք կ՛ենթարկուին մասնագիտական տնտեսական ծրագրի պատրաստութեան, որպէսզի կարենան իրենց փոքրածաւալ պիզնէսները հիմնել:

Նմանօրինակ դասընթացքներու մասնակցութիւնը մեծ ծախսեր կ՛ենթադրէ, առ այդ Աւետարանական համայնքը այս նպատակով ներդրումներ կը ստանայ:

Դոկտ. Հարություն Սելիմյան - Այս ծրագիրներուն իրագործման մէջ մեր կողքին ունեցանք Ամերիկայի Հայ Աւետարանչական Ընկերակցութիւնը և Աւետարանական եկեղեցիներու միաւորը Հոլանտայի մէջ: Այս ծրագիրը ստացաւ նաև սուրիական ասպնջական հայրենիքի իշխանութիւններու օրհնութիւնն ու հովանաւորութիւնը:

Դասընթացքի մասնակցողներու ամբարած գիտելիքներու արժևորման հիման վրայ` լաւագոյնները կը ստանան իրենց սորված արհեստին ամբողջական իրերն ու սարքաւորումները: Լենան թէև համալսարանի ուսանող է, սակայն կը կարծէ, որ ուսման կողքին երիտասարդը կարիք ունի նաև արհեստ սորվելու և որովհետև ինք մանկութենէն կը սիրէր ձևագիտութիւնը մասնակցած է այդ դասընթացքին:

Լենա Չոքկարյան (Դասընթացի մասնակից) - Եթէ մենք պիտի բանանք գործատեղ ինչ մեքենաներ պէտք է բերենք, ասոնք ամէնը պարոնը մեզի բացատրեց: Սկիզբը տեսական սորվեցանք յետոյ գործնականի անցանք, երբ որ աւարտենք մեզի պիտի տրամադրուի ամէն տեսակ գործիքներ, որպէսզի ասպարէզը շարունակենք:

Նախաձեռնող կողմը կը հաւատայ, որ դժուար պայմաններ դիմագրող հայ երիտասարդին նեցուկ կանգնիլը օրուան հրամայականն է: Վերապատուելի դոկտ.Յարութիւն Սելիմեանի խօսքով՝ այս աշխատանքի ոճը երիտասարդներու համար պիտի ըլլայ կեանքի նոր ասպարէզ:

Արան ու Վերան հայկական վարժարանի ուսուցիչներ են և անհրաժեշտ կը համարեն դասաւանդման իրենց եղանակները զարգացնելու համար նորարարութեան հետ քայլ պահել:

Արա ՄութաՖյան (Դասընթացի մասնակից) - Մենք հիմա նախ կը սորվինք dart-ը ինչպէս կը դրուի, code-երը ինչպէս կը դրուին, որպէսզի application կառուցենք: Ամէն ասպարէզ կը դառնակօր application-ի, նոյնիսկ դասաւանդութեան ատեն կրնանք ամէն դասերը application-ի դարձնել:

Վերա Թովմասյան (Դասընթացի մասնակից) - Ամէն ասպարէզներուն մէջ երբ application մը շինես շատ աւելի շուտ կը հասնիս ուզած information-իդ, կրնաս աւելի լաւ ձևով գործերդ կարգի դնել:

Ժիրայրը թղթակից է և կարևոր կը սեպէ այս բնագաւառին առնչուած այլ ճիւղաւորումները եւս սորվիլ, ինքզինք զարգացնել և այդ մէկը ապագայի ասպարէզը դարձնել:

Ժիրայր Կարապետյան (Դասընթացի մասնակից) - Դասընթացքը տեսաերիզներու ձևաւորման և մասնագիտական ձևով պատրաստելն է, յետագային երկրորդ փուլը կայ, որ նկարչութեան մասնագիտութիւնն է:

Աւետարական համայնքի օժանդակութեան ծրագիրները Հալէպի մէջ սկիզբ առած են Եղեռնէն անմիջապէս ետք և այսօր օրուան պայմաններուն համապատասխան տարբեր ուղղութիւններով կը շարունակուին:

Մարիա Պոզիաքալյան-Պոշկեզենյան (Համայնքի քարտուղար) - Մեր աշխատանքները նոր ընթացք առին պատերազմի օրերուն, որովհետև ժողովուրդին կարիքները փոխուեցան, կրկնապատկուեցան և բազմապատկուեցան:

Հալէպահայութեան առօրեայ կարիքներէն մեկնած համայնքը բազմաթիւ օժանդակութիւններ կը տրամադրէ: Այս ծառայութիւնները կը մատուցվին առանց համայնքային պատկանելիութեան տարբերութիւններու:

Հերմինե Մխչյան - Այսօր մենք վառելանիւթ առինք, շատ շնորհակալ ենք որ մեզի կը հոգան այս նեղ պայմաններուն մէջ, այս ցուրտ օրերուն:

Սիլվա Ճալոյան - Փառք Աստուծոյ Վերապատուելի մը ունինք, մեզի կը հոգայ, երբեք չձգեց եօթ տարուան մէջ մեզի առանձին:

Արփի Ինճեճիկյան - Այսօր Բեթէլ եկեղեցիէն վառարան ստացանք և վառելանիւթ, շատ ճիշդ ատենին եկաւ, որովհետև շատ գէշ պայմաններու մէջէն կ՛անցնինք, օդն ալ պաղ է, ելեքտրականութիւնն ալ միշտ կը կտրուի:

Կեանքի տարբեր ասպարէզներուն մէջ երիտասարդութեան մղում տալու ու քաջալերելու, իսկ կարիքաւորներուն ձեռք մեկնելու ծրագիրները սփիւռքի կազմակերպուած համայնքներու գլխաւոր առաքելութիւնը կը համարուի: