Կառավարությունը հաստատեց ծխախոտային արտադրատեսակների փոխարինիչների անվտանգության տեխնիկական կանոնակարգը:
Դրանով սահմանվում են նիկոտին պարունակող արտադրանքի անվտանգությունը բնութագրող ցուցանիշները, դրանց նույնականացմանը, արտադրմանը, մակնշմանը, փաթեթավորմանը, պահպանմանը և փոխադրմանը, ինչպես նաև համապատասխանության գնահատման ընթացակարգերին ներկայացվող պահանջները:
«Մեր այս առաջարկով սահմանափակում ենք ծխախոտային արտադրատեսակների փոխարինիչների ցուցադրումը, շրջանառությունը, օգտագործումը»,- ասաց ՀՀ էկոնոմիկայի նախարար Վահան Քերոբյանը:
Վարչապետ Նիկոլ Փաշինյանն էլ հիշեցրեց, որ հունվարի 1-ից արգելվել է առևտրի կետերում ծխախոտի, ծխախոտային արտադրանքի ցուցադրումը:
ՀՀ վարչապետի աշխատակազմի տեսչական մարմինների աշխատանքների համակարգման գրասենյակի ղեկավար Արթուր Ասոյանը տեղեկացրեց, որ օրենքն ուժի մեջ է մտել ամբողջ ծավալով:
«Կարծում եմ՝ քաղաքացիների համար ակնհայտ պետք է որ լինի և տեսանելի, որ գրեթե տեղեր չկան, որտեղ ցուցադրվի կամ ակնհայտ վաճառք տեղի ունենա: Երբ օրենքը նոր էր մտել ուժի մեջ, ունեինք ստացվող որոշակի ահազանգեր: Այդ ուղղությամբ վարչական վարույթներ ենք հարուցել, պատասխանատվության միջոցների կիրառման փուլում ենք: Նաև նշեմ, որ բարձր տուգանքներ են նախատեսված խախտումների համար, դա իր զսպող ազդեցությունը միանշանակ ունենալու է»,- ասաց Ասոյանը:
