Աբու Դաբիի հանդիպումները մեկնաբանել է Սպիտակ տան բանագնաց Ջարեդ Քուշները, որը Սթիվ Ուիթքոֆի հետ մասնակցում է բանակցություններին: Քուշները դրանք որակել է կառուցողական։
«Նախագահ Թրամփի հանձնարարությամբ՝ աշխատում ենք այս կործանարար պատերազմին վերջ դնելու և անվտանգային այնպիսի պայմաններ ստեղծելու ուղղությամբ, որոնք անհրաժեշտ են ինքնիշխան, ապահով և բարգավաճ Ուկրաինայի, ինչպես նաև ամբողջ Եվրոպայում տևական խաղաղության համար», նշել է ամերիկացի բանագնացը։
ԱՄՆ պետքարտուղարն էլ, որ նոյեմբերի 10-ին Փարիզում հանդիպել էր Ուկրաինայի արտգործնախարարի հետ, համոզմունք է հայտնել, որ Կիևի համար անվտանգության հետպատերազմյան երաշխիքները պետք է ընդունելի լինեն այդ թվում Մոսկվայի համար։ Մարկո Ռուբիոյի խոսքով՝ միայն այդ դեպքում անվտանգության երաշխիքներն արդյունավետ կլինեն:
Նա ընդգծել է, որ ներկայումս քննարկվում են հետպատերազմյան անվտանգային ճարտարապետության տարբեր սցենարներ, որոնք առանցքային են պատերազմին վերջ դնելու համար։
Դիվանագիտական գործընթացներին զուգահեռ՝ Ռուսաստանը և Ուկրաինան շարունակում են փոխադարձ հարվածները: Ռուսական ուժերը զանգվածային հարված են հասցրել Կրիվոյ Ռոգին՝ թիրախավորելով կենսական կարևորության ենթակառուցվածքներ: Խարկովում կան ավերածություններ և տուժածներ:
Ուկրաինական ուժերն էլ տարեսկզբից ամենազանգվածային հարվածն են հասցրել Լենինգրադի մարզին: Ըստ տեղական իշխանության՝ օդային երթևեկությունը և ինտերնետ կապը սահմանափակվել են: Ուստ-Լուգա նավահանգստի տարածքում հրդեհ է բռնկվել, կան վիրավորներ: Զոհեր կան Սմոլենսկի մարզում:
Մանրամասները՝ տեսաշարում:
