Պոլիկլինիկական օղակում կաթվածի կանխարգելումն ու պացիենտների հսկումը կարևոր ձեռքբերում կլինի. Ավանեսյան
Առողջապահության նախարար Անահիտ Ավանեսյանն ընդունել է Հայաստանի կաթվածի խորհրդի գործադիր կազմի ներկայացուցիչներին և նյարդաբանական ծառայության ղեկավարների:
Ինչպես հայտնում են ՀՀ առողջապահության նախարարությունից, որպես պիլոտային ծրագիր` Հայաստանի կաթվածի խորհուրդն առաջարկել է սկսել կաթվածի երկրորդային կանխարգելման կազմակերպում այն հիվանդանոցներին կից պոլիկլինիկաներում, որտեղ կան կաթվածի համապարփակ կենտրոններ և դա իրականացնել կաթվածի նյարդաբանների օգնությամբ:
Հետագայում, նախատեսվում է ընդլայնել երկրորդային կենտրոնների քանակը և ստեղծել առաջնային կանխարգելման կենտրոններ Երևանի պոլիկլինիկաներում և մարզերում:
Անահիտ Ավանեսյանը նշել է, որ պոլիկլինիկական օղակում կաթվածի կանխարգելումն ու պացիենտների հսկումը կարևոր ձեռքբերում կլինի, ուստի լրացուցիչ քննարկումներից հետո հնարավոր կլինի սկսել պիլոտային ծրագիրը:
Անդրադարձ է եղել Լոռու մարզում գլխուղեղի սուր և ենթասուր իշեմիկ կաթվածների թրոմբոլիտիկ բուժման ծրագիրն ընդլայնելու հնարավորություններին:
Քննարկվել է մարզերում կաթվածի ծրագրի շրջանակներում հեռաբժշկության զարգացմանը, ինչպես նաև մասնագետների վերապատրաստմանը վերաբերող հարցեր:
