Արցախի նախագահի հետ ամենօրյա շփումների մեջ ենք, ընդ որում՝ հիմնականում ես եմ նախաձեռնողը: Զանգում եմ, հարցնում՝ ինչ կա խանութներում, ընդհանուր իրավիճակը ինչպես է: Այդ մասին ասուլիսի ժամանակ ասաց ՀՀ վարչապետ Նիկոլ Փաշինյանը:
Վարչապետն ընդգծեց, որ ռուս խաղաղապահների վերաբերյալ տեսակետների ոչ մի տարբերություն չկա:
«Մնացած հարցերում, իհարկե, կան տարբեր տեսակետներ, որովհետև նա ԼՂ նախագահն է, ես ՀՀ վարչապետն եմ: Ի՞նչն է այդտեղ վախենալու: Կա բանավեճ, կա խոսակցություն, կա քննարկում, և ես հարգում եմ ԼՂ նախագահի, ԱԺ-ի և Կառավարության, քաղաքացիական հասարակության բոլորի կարծիքը, և ինձ իրավունք եմ վերապահում նաև դիտարկումներ անել այդ կարծիքների վերաբերյալ, այսինքն՝ քննարկում, բանավեճ կա, ազդո՞ւմ է դա արդյոք մեր անձնական և աշխատանքային հարաբերությունների, եթե ազդում է՝ միայն դրական:
Որովհետև անկեղծության, փոխադարձ հարգանքի մթնոլորտն ամենակարևորն է»,- նշեց Փաշինյանը:
