260 միլիոն դրամ՝ 10 դպրոց անհրաժեշտ գույքով ապահովելու համար

Սեյսմիկ անվտանգության բարելավման ծրագրով վերակառուցված Երևանի համար 135 հիմնական դպրոցն է: Շենքային և գույքային պայմաններով հագեցած դպրոցում սովորում է մոտ 1800 աշակերտ:

Գարեգին Ներսիսյան (Երևանի համար 135 դպրոցի տնօրեն) - Գույքն ամբողջովին նոր է, տրվել է ՀՀ Կառավարության կողմից, մենք էլ ինչ գնում ենք՝ նորն ենք գնում, որ կարողանանք մեր երեխաներին լավագույնով ապահովենք:

Դպրոցը վերակառուցել է ՀՏԶՀ-ն՝ Ասիական զարգացման բանկի վարկային միջոցներով:
Քիմիայի, ֆիզիկայի, կենսաբանության լաբորատորիաներ, մարզադահլիճ՝ բոլորը՝ կահավորված անհրաժեշտ գույքով: Փոխված միջավայրը փոխել է նաև երեխաների տրամադրությունը:

Գարեգին Ներսիսյան - Եթե նախկինում ծնողներն էին ասում, որ երեխաները չեն ուզում դպրոց գալ, հիմա մենք ենք ծնողներին ասում, որ երեխաները չեն ուզում տուն գալ դպրոցից:

Կառավարության առաջնահերթություններից է ոչ միայն դպրոցների շենքային պայմանների բարելավումը, այլև՝ գույքային հագեցվածությունը:

Արթուր Սողոմոնյան (ՀՏԶՀ գործադիր տնօրեն) - Պահանջ է դրվել, որ գործող չափորոշիչներին համապատասխան՝ նախ գնահատվի յուրաքանչյուր դպրոցի կարիք, և ԿԳՄՍ նախարարության հետ համաձայնեցնելուց հետո նոր հայտարարենք գույքի ձեռքբերման մրցույթ:

Եթե նախկինում գույքի ձեռքբերման գործընթացը մեկնարկում էր շինարարության ավարտին զուգահեռ, հիմա պայմանները փոխվել են:

Արթուր Սողոմոնյան - Հիմա Կառավարությունը նախապես էդ խնդիրը քննարկել է ու նախապես ֆինանսական միջոցներ է հատկացրել, որ հնարավորություն ընձեռվի շինարարության ավարտին զուգահեռ ավարտել նաև կահավորումը:

Դպրոցի շինարարությունը կհամարվի ավարտված միայն անհրաժեշտ գույքով կահավորվելուց հետո:

Արթուր Սողոմոնյան - Գույքը կլինի այնպիսին, որ բավարարի Կառավարության կողմից առաջադրված կրթական չափորոշիչները:

Այս պահին սեյսմիկ անվտանգության բարելավման ծրագրով շինարարության տարբեր փուլերում է գտնվում 23 դպրոց, հաջորդ տարվա առաջին կիսամյակում նախատեսվում է ավարտել մի քանի դպրոցի շինարարություն, 10 դպրոցի գույքի համալրման համար գործադիրը հատկացրել է մոտ 276 մլն դրամ: Լաբորատորիաները ևս կհամալրվեն անհրաժեշտ գույքով։ Նյութերը ձեռք կբերի դպրոցը։