ԱԺ «Քաղաքացիական պայմանագիր» խմբակցության պատգամավոր Արմեն Խաչատրյանը ԱԺ-Կառավարություն հարցուպատասխանի ժամանակ փոխվարչապետ Համբարձում Մաթևոսյանից հետաքրքրվեց, թե ինչպիսի միջոցառումներ են իրականացվում Հայաստանի սուվերեն տարածքի վրա գույքի հափշտակություններով ու թալանով ուղեկցվող հարձակումների հետևանքով քաղաքացիների գույքային վնասները փոխհատուցելու ուղղութամբ:
«Կառավարությունը մի շարք ծրագրեր ունի աջակցելու Ադրբեջանի ագրեսիայից տուժած համայնքներին, մարզերին, այս դեպքում՝ Վայոց ձորի, Գեղարքունիքի և Սյունիքի մարզերին:
Մենք Կառավարության նախորդ նիստերում օրակարգային հարցերում նաև քննարկեցինք և մարզպետարաններին հատկացրեցինք գումար՝ սոցիալական խնդիրներ լուծելու համար: Բացի սրանից, ունենք Քաղաքաշինության կոմիտեով ընթացիկ այլ աշխատանքներ, աշխատանքները պետք է իրականացվեն այն համայնքերում, որտեղ տուժել են քաղաքացիների և՛ սեփականությունը և՛, իհարկե, պետական գույքը: Խոսքը վերաբերում է դպրոցներին ու մանկապարտեզներին, այս դեպքում մենք միանշանակ կաջակցենք, եթե պարզվի, որ քաղաքացիները տուժել են ագրեսիայի հետևանքով»,- նշեց Համբարձում Մաթևոսյանը:
