ԿԽՄԿ Երևանի գրասենյակը հնարավոր գերեվարված անձանց վերաբերյալ տեղեկություններ է հավաքում
Կարմիր խաչի միջազգային կոմիտեի Երևանի գրասենյակը հավաքում է վերջին ռազմական գործողությունների հետևանքով հնարավոր գերեվարված անձանց վերաբերյալ տեղեկությունները:
Հայաստանում կազմակերպության պատվիրակության հաղորդակցման ծրագրերի ղեկավար Զառա Ամատունին «Լուրերին» հայտնել է, որ երեկվանից գրասենյակ են դիմում անձինք, որոնք կասկածներ ունեն, որ, հնարավոր է՝ իրենց հարազատը գերեվարվել է:
Ըստ Ամատունու՝ երկխոսության մեջ են պատկան մարմինների հետ՝ հայ զինծառայողների հնարավոր գերության մասին տեղեկությունները ճշգրտելու համար:
«Ինչ վերաբերում է այսօր Ադրբեջանի իշխանությունների կողմից տարածված հաղորդագրությանն այն մասին, որ Կարմիր խաչի միջազգային կոմիտեն տեղեկացվել է իրենց մտադրության մասին, որ միակողմանի կարգով պատրաստ են հայկական կողմին փոխանցել զոհված հայ զինվորների մարմիններ, մենք կարող ենք հաստատել նման հաղորդագրության ստացումը:
Ինչ վերաբերում է հետագա քայլերին, մենք աշխատում ենք կողմերի պատկան մարմինների հետ՝ առաջարկելով մեր ծառայությունները որպես չեզոք միջնորդ: Այդ մասին նաև տեղեկացրել ենք հանրությանը երեկ տարածած հաղորդագրության մեջ:
Նման մարդասիրական գործողություններում չեզոք միջնորդ հանդես գալու համար անհրաժեշտ է երկու կողմերի համաձայնությունը, որպեսզի կարողանանք մարդասիրական ընթացակարգով կատարել այդ դերը»,- ասել է Ամատունին:
