ՄԱԿ-ի բնակչության հիմնադրամի հայաստանյան գրասենյակն ամփոփել է հանրապետությունում վերարտադրողական տարիքի շուրջ 3000 անձի շրջանում իրականացված հետազոտության արդյունքները: Մեր երկրում անպտղության ցուցանիշը 16.8 % է, որը բարձր է Առողջապահության համաշխարհային կազմակերպության սահմանած 15 տոկոսից:
Մհեր Մանուկյան (ՄԱԿ-ի Բնակչության հիմնադրամի հայաստանյան գրասենյակի հասարակայնության հետ կապերի համակարգող) - Ըստ հետազոտության տվյալների՝ պարզվում է, որ մեզ մոտ յուրաքանչյուր 7-րդ կին ունի անպտղություն, և յուրաքանչյուր 5-րդ տղամարդ ունի անպտղություն, և այդ անպտղության առյուծի բաժինը երկրորդային անպտղությունն է՝ կանխարգելելի անպտղությունը:
Երկրորդային անպտղություն ունեն այն զույգերը, որոնք առնվազն 1 երեխա ունեն, և վերջին 1 և ավելի տարում չեն կարողանում հասնել հղիության: Առաջնային անպտղություն ունի հարցվածների 1,7 %-ը: Այս առումով ցուցանիշը նվազել է:
Սա այն դեպքն է, երբ զույգերը երեխա չունեն:
Մհեր Մանուկյան - Շատ ենք հանդիպում դեպքերի, երբ տղամարդիկ մեկնում են արտագնա աշխատանքի ՌԴ, հետո իրենց հետ բերում են որոշակի վարակներ, փոխանցում են իրենց կանանց, և երկար ժամանակ դա չի նկատվում, մինչև բանը չի հասնում անպտղության:
Սեռավարակներից մինչև աբորտներ. անպտղության պատճառները տարբեր են: Առողջապահության նախարարության ներկայացուցչի խոսքով՝ անպտղության խնդրին պետք է հետամուտ լինել վաղ փուլում:
Ռուզան Մարտիրոսյան (ՀՀ ԱՆ մոր և մանկան առողջության պահպանման վարչության մայրական և վերարտադրողական առողջության պահպանման բաժնի պետ) - Ցանկացած ամուսնական զույգ, երբ գրանցում է իր ամուսնությունը ՔԿԱԳ-ում, կարող է դիմել իր գրանցման առաջնային բժշկական օգնության կազմակերպություն և ստանալ անհրաժեշտ խորհրդատվությունը, որոշակի հետազոտություններ, եթե անհրաժեշտություն լինի՝ նաև բուժում, որը միտված կլինի վերարտադրողական ֆունկցիայի իրացմանը:
Առաջիկայում առողջ սերունդ ունենալու և անպտղությունից խուսափելու համար կարևոր է աբորտների թվի նվազեցումը, մինչդեռ ըստ հետազոտության՝ այս խնդիրը մեր երկրում դեռ առկա է:
Մհեր Մանուկյան - Հարցվող կանանց մոտ 46 տոկոսը նշել է, որ երբևէ կատարել է աբորտ՝ տարբեր պատճառներով: Պատճառներից առաջին տեղում արդեն իրենց ցանկալի թվով երեխաներ ունենալն է, որ կանայք նշում են: Պտղի սեռով պայմանավորված՝ նշել է հարցվողների 8 տոկոսը:
Մեր երկրում գործում է անպտղության հաղթահարման պետական ծրագիր, որով արտոնյալ և անվճար պայմաններով բուժօգնություն է տրամադրվում զույգերին՝ պատճառի ախտորոշումից մինչև արհեստական բեղմնավորում: Ծրագրից կարող են օգտվել՝
Ռուզան Մարտիրոսյան - Այն զույգերը, որոնց ամուսիններից մեկը զինվորական է կամ նրա կարգավիճակին հավասարեցված անձ, կարող են լինել այն ամուսնական զույգերը, որոնց ամուսիններից մեկը հաշմանդամություն ունի, սահմանամերձ բնակավայրերի բնակիչները, կարող են լինել զոհված զինծառայողների ծնողները:
Արտամարմնային բեղմնավորման առաջին փորձը պետությունը փոխհատուցում է 100 տոկոսով, երկրորդ փորձը՝ 50 տոկոսով:
Արարատ Միրզոյանը մեկնել է ԱՄՆ՝ մասնակցելու ՄԱԿ-ի ԳԱ նստաշրջանի քննարկումներին
Մակրոնը հանդիպումներ է ունեցել Թրամփի և Զելենսկու հետ
Հասանք ինքնաթիռի մեր տեղին. Փաշինյան
Շախմատի համաշխարհային օլիմպիադա. Հայաստանի հավաքականը 6 խաղափուլից հետո 3-րդ տեղում է
Լուրեր 13:00 | «Գոլդեն Փելիս»-ին օտարված հողատարածքը կվերադարձվի Հայաստանի Հանրապետությանը
Այս օդանավով ենք թռչելու Նյու Յորք. Նիկոլ Փաշինյան