Սևանա լճի ավազանի համայնքներում բնապահպանական օրինակելի կենսամիջավայրի ձևավորումը մեր առաջնային խնդիրներից է. Հակոբ Սիմիդյան

Շրջակա միջավայրի նախարար Հակոբ Սիմիդյանն ընդունել է «Դար» տարածաշրջանային զարգացման և մրցունակության հիմնադրամի տնտեսական ծրագրերի խորհրդատու Արամ Ղարիբյանին, իրավախորհրդատու Վիտալի Բաբայանին և կրթական ծրագրերի խորհրդատու Աշոտ Բլեյանին։

Նախարարին է ներկայացվել «Գագարին» նախագիծը, որը հնարավորություն կտա ձևավորելու զարգացող և նորարար կենսակերպով ինքնաբավ համայնքներ:

«Դար» տարածաշրջանային զարգացման և մրցունակության հիմնադրամը իրականացնելու է տարածաշրջանի զարգացման ծրագիր: Այս համայնքներում հիմա բնակվում է մոտ 11 հազար բնակիչ: 34 հազար հեկտարի վրա իրականացվելու են ևս 24 հազար բնակիչների համար նախատեսված ենթակառուցվածքների, շենք-շինությունների կառուցապատում, էկոտուրիզմի, գյուղատնտեսական արժեշղթայի ստեղծում:

Նախարարին է ներկայացվել նախագծի բնապահպանական կոմպոնենտը․ ստեղծվելու են ժամանակակից լուծումներով էներգետիկ, գյուղատնտեսական, քաղաքաշինական և զբոսաշրջային ենթակառուցվածքներ:

Մեծ տեղ է հատկացվելու էկոլոգիային և ջրային ռեսուրսներին: Նախատեսվում է վերականգնել Հրազդան գետի հունը, լեռնային ջրամբարներն ու ջրի այլ աղբյուրները օգտագործել գյուղատնտեսական հողերի ոռոգման համար:

 

 

«Որքան զարգացած և կայացած են Գեղարքունիքի մարզի համայնքները, այնքան ավելի նվազում է ճնշումը Սևանա լճի վրա։ Սևանա լճի ավազանի համայնքներում բնապահպանական օրինակելի կենսամիջավայրի և վարքագծի ձևավորումը մեր առաջնային խնդիրներից մեկն է»,- նշել է նախարարը և խոստացել իր լիազորությունների և հնարավորությունների սահմանում անել հնարավորը, որպեսզի նախագծի կյանքի կոչման արդյունքում շրջակա միջավայրի պահպանության և պաշտպանության ոլորտում նշանակալի առաջընթաց գրանցվի։