««Խաղաղ նպատակներով տիեզերական տարածության հետազոտման և օգտագործման ոլորտում Անկախ պետությունների համագործակցության մասնակից պետությունների համատեղ գործունեության իրականացման մասին» համաձայնագրի հիմքում է խաղաղ նպատակներով տիեզերական տարածության հետազոտման և օգտագործման ոլորտում բազմակողմ համագործակցության իրավական և կազմակերպական հիմքերը սահմանելը, ինչպես նաև համատեղ տիեզերական գործունեության որոշակի ուղղությունների մասով համաձայնագրեր ու այլ պայմանավորվածություններ մշակելու և դրանք կողմերի ու համատեղ գործունեության մասնակիցների միջև կնքելու համար իրավական հիմքի ստեղծմանն աջակցելը:
Այս մասին տեղեկացրել է ՀՀ բարձր տեխնոլոգիական արդյունաբերության նախարարի տեղակալ Ավետ Պողոսյանն ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի հուլիսի 4-ին հրավիրած արտահերթ նիստի ժամանակ:
Հանձնաժողովը քննարկել է ««Խաղաղ նպատակներով տիեզերական տարածության հետազոտման և օգտագործման ոլորտում Անկախ պետությունների համագործակցության մասնակից պետությունների համատեղ գործունեության իրականացման մասին» համաձայնագիրը վավերացնելու մասին» օրենքի նախագիծը:
Փաստաթուղթը 2018 թ. նոյեմբերի 2-ին ստորագրել են Հայաստանի Հանրապետության, Բելառուսի Հանրապետության, Ղազախստանի Հանրապետության, Ռուսաստանի Դաշնության, Տաջիկստանի Հանրապետության և Ուզբեկստանի Հանրապետության կառավարությունները:
Համաձայնագիրն ուժի մեջ է մտել 2019 թ. սեպտեմբերի 20-ից:
Այն վավերացրել են Բելառուսի, Ղազախստանի, Տաջիկստանի և Ուզբեկստանի հանրապետությունները, Ռուսաստանի Դաշնությունը:
Հարակից զեկուցող Նարեկ Բաբայանը հայտնել է, որ համաձայնագրում որևէ խնդրահարույց դրույթ չկա, և նպատակահարմար է Հայաստանի կողմից այն վավերացնելը:
Պատգամավորը նաև հայտնել է, որ այս համաձայնագրին Ադրբեջանն առնչություն չունի:
««Խաղաղ նպատակներով տիեզերական տարածության հետազոտման և օգտագործման ոլորտում Անկախ պետությունների համագործակցության մասնակից պետությունների համատեղ գործունեության իրականացման մասին» համաձայնագիրը ստացել է հանձնաժողովի դրական եզրակացությունը: Այն նախատեսվում է քննարկել հուլիսի 6-ին գումարվելիք ԱԺ արտահերթ նստաշրջանի ժամանակ:
