Ամփոփվել են ՀՀ բարձր տեխնոլոգիական արդյունաբերության նախարարության հայտարարած «Տիեզերական ճամբար 2022» (#SpaceCamp2022) ծրագրի մասնակիցների ընտրության արդյունքները։ Այդ մասին հայտնում են ՀՀ բարձր տեխնոլոգիական արդյունաբերության նախարարությունից:
Մասնակցության դիմում ներկայացրած 940 պատանիներից, թեստային առաջադրանքի արդյունքներով, ընտրվել են առավելագույն միավորներ հավաքած 100 լավագույնները։
Բացի Հայաստանից և Արցախից, «Տիեզերական ճամբար 2022»-ին մասնակցելու դիմումներ են ստացվել նաև սփյուռքի տարբեր բնակավայրերից՝ ԱՄՆ-ից, Բելառուսից, Իսպանիայից, Իրանից, Միացյալ Թագավորությունից, Ուզբեկստանից, Պաղեստինից, Սիրիայից, ՌԴ-ից, Վրաստանից։
«Տիեզերական ճամբար 2022» (SpaceCamp 2022) ծրագիրն իրականացվում է ՀՀ բարձր տեխնոլոգիական արդյունաբերության նախարարության ֆինանսավորմամբ՝ «Հայաստանի հրթիռամոդելային ասոցիացիա» հիմնադրամի և «ԱՅԱՍ» տիեզերագիտական ընկերության համագործակցությամբ։
Ճամբարի նպատակն է օժանդակել տիեզերքին առնչվող բնագիտական առարկաներից բացառիկ ունակություններով պատանիներին՝ մասնագիտական կողմնորոշման, աստղագիտության, տիեզերական տեխնիկայի, տիեզերագիտության մի շարք այլ բնագավառներում գիտելիքների հարստացման հարցում։
