Տարածքները, որոնք չեն գտնվում ԼՂԻՄ նախկին սահմանի մեջ, անցնելու են Ադրբեջանի վերահսկողությանը. Փաշինյան
Այսօր ՀՀ վարչապետ Նիկոլ Փաշինյանին առցանց ասուլիսի ժամանակ լրագրողներից մեկը հարց ուղղեց այն մասին, որ Ադրբեջանն արդեն սկսել է Բերձորը շրջանցող նորակառույց ավտոճանապարհի ասֆալտապատման աշխատանքը:
Հայկական կողմը նոր ճանապարհի երթուղու շուրջ քննարկումներին մասնակցություն ունեցե՞լ է, և շահագործման դեպքում ինչ ճակատագիր է ունենալու Բերձոր, Աղավնո և Սուս համայնքների բնակչությունը:
«Տվյալ պարագայում երթուղու փոփոխություն տեղի ունենալու պարագայում այն տարածքները, որոնք չեն գտնվում Լեռնային Ղարաբաղի ինքնավար մարզի նախկին սահմանի մեջ, անցնելու են Ադրբեջանի վերահսկողությանը:
Լաչինի բնակիչների խնդիրները մենք կառավարության որոշումներով լուծում ենք: Բնակիչները պետք է բնակարանով ապահովվեն: Ըստ էության Լաչինում այսօր ընտանիքներ չեն ապրում: Աղավնո գյուղի բնակիչների խնդիրներն Արցախի կառավարության միջոցներով, կարծում եմ, կլուծվեն: Սուսի վերաբերյալ չեմ կարող ասել, որովհետև այս պահին այդպիսի տեղեկություններ չունեմ»,- ասաց վարչապետը:
