Բյուրեղավանում ավարտական միջոցառումից հետո թունավորման ախտանիշներով հոսպիտալացվել է 14 անձ
2022 թվականի հունիսի 3-ին Բյուրեղավանի հիմնական դպրոցի աշակերտները ծնողների և ուսուցիչների հետ (թվով 65 անձ) նշել են ավարտական միջոցառում, որի ժամանակ օգտագործել են խոզի մսի և հավի ճտի խորոված, բանջարեղենային աղցան՝ հավի կրծքամսով և ձեթով, ինչպես նաև գործարանային արտադրության հյութեր:
Հիվանդությունների վերահսկման և կանխարգելման ազգային կենտրոնից հայտնում են՝ միջոցառման հաջորդ օրը ներկաներից դիմել են «Բյուրեղավանի քաղաքային պոլիկլինիկա» ՓԲԸ, որտեղից ուղեգրվել են «Ռ. Հարությունյանի անվան Աբովյանի ԲԿ» ՓԲԸ: Դիմողներն ունեցել են թուլություն, դող, սրտխառնոց, փսխում, գլխապտույտ, լուծ, ուժեղ ցավեր որովայնի շրջանում:
Հունիսի 6-ի ժամը 17:45-ի դրությամբ «Ռ. Հարությունյանի անվան Աբովյանի ԲԿ» ՓԲԸ-ի ինֆեկցիոն բաժանմունքում հոսպիտալացված է 14 հիվանդ:
Տուժածները ստանում են համապատասխան բուժում, վիճակները գնահատվում է միջին ծանրության:
Հիվանդությունների վերահսկման և կանխարգելման ազգային կենտրոնի մասնագետների կողմից հիվանդներից լաբորատոր հետազոտության նպատակով վերցվել են կենսանմուշներ և խմելու ջրի նմուշ։
Դեպքի մասին տեղեկատվությունը տրամադրվել է Սննդամթերքի անվտանգության տեսչական մարմնին:
Աշխատանքները շարունակվում են:
