Ամփոփվել է ԵԱՏՄ պետությունների համակարգված տրանսպորտային քաղաքականության իրականացման միջոցառումների ընթացքը
ՀՀ տարածքային կառավարման և ենթակառուցվածքների նախարար Գնել Սանոսյանն այսօր հեռակապով մասնակցել է Բիշքեկում անցկացվող Եվրասիական տնտեսական միության մասնակից պետությունների տրանսպորտի ոլորտի լիազոր մարմինների ղեկավարների խորհրդի 5-րդ նիստին։ Այդ մասին ասված է նախարարության Ֆեյսբուքի էջում:
«Բիշքեկում նիստին ներկա է եղել նաև տարածքային կառավարման և ենթակառուցվածքների նախարարի տեղակալ Արմեն Սիմոնյանը։
Նիստի ընթացքում ներկայացվել է վերոնշյալ խորհրդի 4-րդ նիստի որոշումների կատարման ընթացքը, ամփոփվել է ԵԱՏՄ մասնակից պետությունների համակարգված տրանսպորտային քաղաքականության իրականացման հիմնական ուղղությունների և փուլերի կատարմանն ուղղված միջոցառումների ծրագրի ընթացքը, խոսվել է միջազգային ավտոմոբիլային բեռնափոխադրումների ազատականացման նպատակահարմարության մասին։
Քննարկվել է թռիչքների անվտանգության և ավիացիոն անվտանգության հարցերով աշխատանքային խմբերի ստեղծման հարցը։
Օրվա երկրորդ կեսին նախարարը կրկին հեռակապով մասնակցել է նաև ԵԱՏՄ մասնակից պետությունների էներգետիկ ոլորտի լիազոր մարմինների ղեկավարների խորհրդի առաջին նիստին, որին Բիշքեկում մասնակցել է նաև նախարարի տեղակալ Հակոբ Վարդանյանը։
Նիստի ժամանակ քննարկվել են ԵԱՏՄ էլեկտրաէներգետիկական ընդհանուր շուկայի և գազի ընդհանուր շուկայի ձևավորման հետ կապված հարցեր»,- նշված է գրառման մեջ։
