«Սևան» ազգային պարկում սպասում են 5 նոր լողափերի ներդրողներին. դիմելու վերջնաժամկետը հունիսի 9-ն է
«Սևան ազգային պարկ» ՊՈԱԿ-ում սպասում են հանրային 5 նոր լողափերի ներդրողներին: Այս վայրերում բիզնես անողների համար մրցույթը հայտարարված է հինգ լոտով:
Ոսկեհատ Գրիգորյան (ՀՀ ՇՄՆ բնության հատուկ պահպանվող տարածքների և կենսաբազմազանության քաղաքականության վարչության պետ) - Հայտարարությունը հրապարակվել է մայիսի 5-ին, և հայտերի ընդունման ժամկետն ավարտվում է հունիսի 9-ին, հայտերը ընդունվում են «Սևան ազգային պարկ» ՊՈԱԿ-ի վարչական շենքում: Հայտերը ներկայացվում են փակ ծրարների միջոցով:
Նոր լողափեր կբացվեն Շողակաթում, Լճաշենում, Ծովազարդում, Նորատուսում և Ծովագյուղում: Լողափերի բարեկարգման, կահավորման և սպասարկման իրավունքի ժամկետ է սահմանված 7 տարի, որից 2 տարին հաղթողն ազատվում է վարձավճարի պարտավորությունից: Փոխարենը տնտեսվարողից պահանջվում է ապահովել հանգստի պատշաճ պայմաններ: Պայմանները շատ խիստ չեն՝ ասում է բնության հատուկ պահպանվող տարածքների պատասխանատուն:
Ոսկեհատ Գրիգորյան - Հաշվի առնելով տարիների կտրվածքով հանրային լողափերում բացասական երևույթները, մասնավորապես, տարբեր տեղերից հնչող բարձր երաժշտությունը, ծխելու, խմիչքի գերշահագործման հետևանքով վիճաբանությունները և այլն, այս մասով էլ կարգավորումներ են սահմանված:
Ծխելն արգելվում է անմիջապես լողափնյա գոտում, դրա համար կլինեն հատուկ առանձնացված տարածքներ: Կթույլատրվի միայն թույլ ալկոհոլային խմիչքների օգտագործումը: Ամենուրեք խորովածի ծխի մասին խոսք լինել չի կարող: Սննդի ձեռքբերումը կլինի մեկ կետից:
Ոսկեհատ Գրիգորյան - Մարդը հնարավորություն է ունենալու պատվիրելու իր սնունդը կամ իր հետ բերված մսամթերքը պատվիրելու հատուկ տեղ, որտեղ ծխատարներ են լինելու, և հրդեհի անվտանգության պայմանները բավարարված կլինեն:
Լողափնյա հատվածները կլինեն պասիվ, ակտիվ հանգստի սիրահարների համար կգործեն բուֆերային գոտիներ: Ավտոմեքենաների կայանատեղիները, հովանոցային հատվածները, հանդերձարանները, ցնցուղարանները, սանհանգույցը կլինեն անվճար: Կգործեն բուժկետ, փրկարարական կետ, թեժ գծի հեռախոսահամար:
