«Իմ քայլը» հիմնադրամը ձեռնամուխ է եղել հանրակրթության ոլորտում կրթական նոր մոդելի մշակմանը. Մխիթար Հայրապետյան
«Իմ քայլը» հիմնադրամի նախաձեռնությամբ իրականացվող «Հորիզոններ» կրթական ծրագրի շրջանակներում այսօր Օշականի Մեսրոպ Մաշտոցի անվան միջնակարգ դպրոցում տեղի է ունեցել ուսումնական պլանի վերաբերյալ դասընթաց, որին մասնակցել են Օշականի, Սասունիկի, Կարինի, Ոսկեվազի, Ոսկեհատի, Ագարակի դպրոցների տնօրենները և ուսումնական գծով փոխտնօրենները։
Դասընթացը վարել է «Մխիթար Սեբաստացի» կրթահամալիրի փոխտնօրեն Գևորգ Հակոբյանը, ներկա էին «Իմ քայլը» հիմնադրամի տնօրեն Մխիթար Հայրապետյանը, փոխտնօրեն Նարեկ Ադամյանը և «Հորիզոններ» ծրագրի ղեկավար, պատմաբան Վահրամ Թոքմաջյանը։
Դասընթացի թեման էր «Պետական կրթական չափորոշչի առանձնահատկությունները և սովորողների ազատ բաղադրիչի ընտրության կազմակերպման գործընթացը»։
«Հորիզոններ» կրթական ծրագիրն ուղղված է հանրակրթության ոլորտում դուալ կրթության նոր և հասանելի մոդելի ստեղծմանը՝ թիրախավորելով Հայաստանի մարզային բնակավայրերը։
Ծրագիրը հնարավորություն կտա աշակերտներին ձեռք բերելու նոր հմտություններ և կարողություններ, աշխատելու մասնագիտական ոլորտներում՝ ապահովելով սեփական ֆինանսատնտեսական կայունությունն ու նպաստելով սեփական մասնագիտական աճին։
