Արդարադատության նախարարությունն իրականացնում է իրավաբանական ծառայությունների ոլորտի բարեփոխումներ
Հայաստանի Հանրապետությունում Ռուսաստանի Դաշնության Առևտրային ներկայացուցչության աջակցությամբ Երևանում այսօր մեկնարկել է Հայաստան-Ռուսաստան առաջին իրավական համաժողովը, որը նպատակ է հետապնդում երկխոսություն հաստատել Ռուսաստանի և Հայաստանի իրավական ու գործարար համայնքների ներկայացուցիչների, ֆինանսական կազմակերպությունների և պետական մարմինների միջև, ներկայացնել Հայաստանի իրավական համակարգի առանձնահատկությունները և Հայաստանում բիզնեսավարման հնարավորությունները:
Համաժողովի ընթացքում բացման խոսքով հանդես է եկել Արդարադատության նախարարի տեղակալ Գրիգոր Մինասյանը:
Մինասյանը, մասնավորապես, ընդգծել է. «Այս տարի նշվում է Հայաստան-Ռուսաստան դիվանագիտական հարբերությունների հաստատման 30-ամյակը և համաժողովի անցկացումն ունի խորհրդանշական իմաստ: Բացի միջպետական հարաբերություններից, կարևոր է ամրապնդել և խթանել նաև երկու երկրների գործարար միջավայրերի երկխոսությունը: Գործարար միջավայրի հիմնաքարերից է իրավաբանական ծառայությունների ոլորտը, և կարևոր է, որ Հայաստանի ներդրումային միջավայրը լինի էլ ավելի բարենպաստ, և ներդրողներն ազատվեն բյուրոկրատիկ խնդիրներից»:
Համաժողովի անցկացումը կնպաստի Հայաստան-Ռուսաստան գործարար համայնքի ներկայացուցիչների հետագա արդյունավետ համագործակցության ապահովմանն ու երկկողմ փոխգործակցության առաջմղմանը:
