Դիանա Գասպարյանը և Նիդերլանդների դեսպանը քննարկել են մշակութային կապեր ստեղծելու հեռանկարները
Էջմիածնի համայնքապետ Դիանա Գասպարյանը հանդիպում է ունեցել ՀՀ-ում Նիդերլանդների արտակարգ և լիազոր դեսպան պարոն Նիկոլաս Սխերմերսի հետ:
Հանդիպման ընթացքում կողմերը քննարկել են համագործակցության ուղիների ընդլայնման հնարավորությունները, մշակութային երկկողմ կապեր ստեղծելու հեռանկարները:
Համայնքի ղեկավարը դեսպանին ծանոթացրել է Էջմիածնի պատմությանը, խոսել համայնքի զարգացման տեսլականի և նիդերլանդական Ալմելո քաղաքի հետ նախորդ տարի կնքված քույր քաղաքների հուշագրի ընձեռած հնարավորությունների և հետագա փոխգործակցության մասին, պատմել պաշտոնավարման ընթացքում համայնքում կատարված աշխատանքների ու փոփոխությունների մասին։
Դեսպան Նիկոլաս Սխերմերսը խոսել է դեսպանատան գործունեության առաջնահերթությունների, երկու երկրների ու քույր քաղաքների միջև հնարավոր ուղղություններում երկկողմ կապերն առավել խորացնելու ու ընդլայնելու հեռանկարների մասին։
Հանդիպման ավարտին դեսպանը շրջայց է կատարել համայնքապետարանի նախասրահում, ծանոթացել էջմիածինցի արվեստագետների կտավներին, այցելել Պատմաազգագրական թանգարան:
