Միջբուհական կապերի ձևավորման հնարավորությունը Հայաստանի և Դոմինիկյան Հանրապետության միջև. հանդիպում ԿԳՄՍ նախարարությունումում
ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանն ընդունել է Հայաստանի Հանրապետությունում Դոմինիկյան Հանրապետության նորանշանակ արտակարգ և լիազոր դեսպան Հանս Դաննենբերգ Կաստելյանոսին (նստավայրը՝ ք.Մոսկվա):
Հանդիպմանը քննարկվել են երկու երկրների միջև կրթության, մշակույթի, սպորտի, երիտասարդության ոլորտներում համագործակցության հնարավորությունները և իրավապայմանագրային դաշտի ձևավորմանն առնչվող հարցեր:
ԿԳՄՍ նախարարի տեղակալ Արթուր Մարտիրոսյանը ներկայացրել է կրթության ոլորտում Հայաստանում իրականացվող բարեփոխումները՝ շեշտելով, որ բարձրագույն կրթության ոլորտում էական շեշտադրում է արվում բուհերի միջազգայնացմանը, հայաստանյան կրթական ծառայությունների արտահանմանը, այդ թվում՝ օտարերկրյա ուսանողների ներգրավման միջոցով։ Հանս Դաննենբերգ Կաստելյանոսը կարևորել է հայկական բուհերում իրենց ուսանողների՝ կրթություն ստանալու հնարավոր հեռանկարները: Երկու պետությունների միջև բարձրագույն կրթության ոլորտում հնարավոր համագործակցության վերաբերյալ Արթուր Մարտիրոսյանը նշել է, որ այն կարող է իրականացվել միջբուհական կապերի ձևավորման միջոցով՝ պատրաստակամություն հայտնելով դիտարկելու միջգերատեսչական մակարդակով համագործակցությունն ամրագրող փաստաթղթի ստորագրման առաջարկը։
Նորանշանակ դեսպանը կարևորել է փոխգործակցության սկիզբը արդեն իսկ կայացած փորձառությունների հիմքով սկսելու հանգամանքը: Հանդիպման ընթացքում կողմերը քննարկել են նաև մշակույթի, կրթության, սպորտի և երիտասարդության ոլորտներում երկկողմանի հետաքրքրություն ներկայացնող տարաբնույթ հարցեր, ուղենշվել համագործակցության ձևավորման առանձին ուղղություններ։
Նշենք, որ ապրիլի 11-ին Հայաստանի Հանրապետությունում Դոմինիկյան Հանրապետության նորանշանակ արտակարգ և լիազոր դեսպան պարոն Հանս Դաննենբերգ Կաստելյանոսը իր հավատարմագրերն է հանձնելու ՀՀ նախագահ Վահագն Խաչատուրյանին:
