Քննարկվել են հայ-ֆրանսիական համաժողովի կազմակերպման վերաբերյալ հարցեր
ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը ընդունել է Ֆրանսիայի ԱԳՆ ֆրանսիական տարածքային միավորների արտաքին հարցերի վարչության պետի տեղակալ Քսավիե դʼԱրգոևին և ՀՀ-ում Ֆրանսիայի դեսպանի խորհրդական Քրիստոֆ Քացախյանին։ Այդ մասին ասված է ՀՀ տարածքային կառավարման և ենթակառուցվածքների նախարարության Ֆեյսբուքի էջում:
«Հանդիպման ընթացքում քննարկվել են հունիսի վերջին Լիոնում կայանալիք հայ-ֆրանսիական ապակենտրոնացված համագործակցության համաժողովի կազմակերպման վերաբերյալ հարցեր։
Վաչե Տերտերյանը ընդգծել է, որ նման քննարկումների կազմակերպումը մինչ համաժողովի անցկացումը շատ լավ առիթ է գաղափարները, մոտեցումները, նպատակներն ու մեխանիզմները մեկ անգամ ևս թարմացնելու և թիմերում ոգևորություն առաջացնելու համար՝ հաշվի առնելով Հայաստանում վերջին շրջանում համայնքային թիմերի պատասխանատուների փոփոխությունները։
Քսավիե դʼԱրգոևը ներկայացրել է Ֆրանսիայի տեղական ինքնակառավարման համակարգի կառավարման յուրահատկությունը և ֆրանսիական տարածքային միավորների արտաքին հարցերի վարչության դերը ՏԻՄ համակարգում՝ հավելեվով, որ կառույցը խթանում է թե՛ կենտրոնացված և թե՛ ապակենտրոնացված համագործակցությունը։
Փոխնախարարը նշել է, որ հայ-ֆրանսիական ապակենտրոնացված համագործակցությունը կարևոր դեր ունի երկու երկրների համագործակցային ծրագրերի շարքում և խթանում է ինչպես համայնքների, այնպես էլ մարզերի միջև գործընկերությունը։ Տերտերյանը հավելել է, որ կողմերի համար գրավիչ կարող է լինել ՀՀ մարզերի և Ֆրանսիայի շրջանների համագործակցության մեծամասշտաբ ծրագրերի իրակացումը։
Հանդիպման ընթացքում կողմերը քննարկել են հայ-ֆրանսիական սերտ համագործակցությանը խթանող այլ հարցեր և պայմանավորվածություն ձեռք բերել Ֆրանսիական ՏԻՄ համակարգի զարգացման փորձը խորապես ուսումնասիրել և կիրառել Հայաստանում»,- նշված է գրառման մեջ։
