Ազգային ժողովը քննարկում է «Պետական տուրքի մասին» օրենքում փոփոխություն կատարելու մասին հարցը:
Օրենքում փոփոխություն կատարելը պայմանավորված է փոքր և միջին ձեռնարկատիրական գործունեության իրականացման ընթացքում ապրանքների արտահանման գործընթացը պարզեցնելու անհրաժեշտությամբ:
«Նախատեսվում է տնտեսվարողներին հնարավորություն ընձեռել չվճարել մեկ փոխադրողից մեկ ստացողին մեկ տրանսպորտային փաստաթղթով ՀՀ-ից արտահանվող՝ ընդհանուր մաքսային արժեքը 1 միլիոն դրամ գումարը չգերազանցող գումարի չափով ապրանքները: Նշված փոփոխությունն ուղղված է նաև մաքսային ձևակերպումների գործընթացի պարզեցմանը»,- ասաց ՀՀ էկոնոմիկայի նախարար Վահան Քերոբյանը:
Ըստ նախագծի՝ պետական տուրքից ազատվում են ՀՀ տարածք մարդասիրական օգնության և բարեգործական ծրագրերի շրջանակներում ներմուծվող ապրանքները, միջազգային կանոնավոր փոխադրումներ իրականացնող տրանսպորտային միջոցները՝ այդ փոխադրումների իրականացման ժամանակ, ֆիզիկական անձանց կողմից առանց մաքսատուրքերի և հարկերի վճարման կամ մաքսատուրքերի և հարկերի վճարումից ազատմամբ՝ ՀՀ պետական սահմանով տեղափոխվող անձնական օգտագործման ապրանքները և այլն:
Նախարարի խոսքով՝ փոփոխությունն ուղղված է մրցակցային միջավայրի բարելավմանը:
