««Հանրակրթության մասին» օրենքում փոփոխություններ և լրացումներ կատարելու մասին» օրենքի նախագծում ամենախոշոր փոփոխությունները տեղի են ունեցել կառավարման բաղադրիչում: Այս մասին ԱԺ այսօրվա նիստի ընթացքում հայտնեց ԿԳՄՍ նախարարի տեղակալ Ժաննա Անդրեասյանը:
Հստակեցվել են տնօրենի որակավորման պահանջները, որտեղ մանկավարժի որակավորումը փոխարինվել է կրթության ոլորտի բարձրագույն կրթությամբ:
«Հստակ սահմանել ենք, որ տնօրենի թափուր պաշտոնի համար հայտարարվում է մրցույթ, և մրցույթն անցկացվելու համար ձևավորվում է մասնագիտական հանձնաժողով»,- ասաց Անդրեասյանը:
Արձագանքելով դպրոցների կուսակցականացման և քաղաքական գործընթացների մեջ ներքաշման մտահոգություններին՝ օրենքի նախագծով առաջարկվում է սահմանել, որ տնօրեն կամ համակարգող չի կարող առաջադրվել և լինել այն անձը, որը կուսակցության ու նրա տարածքային ստորաբաժանումների ղեկավար կամ վերահսկողություն իրականացնող մարմինների անդամ է:
«Կարգավորել ենք նաև շահերի բախման խնդիրը՝ սահմանելով, որ տնօրենն ու համակարգողը չեն կարող մերձավոր ազգակցական կամ խնամիական կապերի մեջ լինել»,- ասաց Անդրեասյանը:
