Փետրվարի 2-ին ԱԺ առողջապահության հարցերի մշտական հանձնաժողովի հերթական նիստում առաջին ընթերցմամբ քննարկվել է ՀՀ ԱԺ պատգամավորներ Նարեկ Զեյնալյանի և Լուսինե Բադալյանի հեղինակած ««Բնակչության բժշկական օգնության և սպասարկման մասին» օրենքում փոփոխություններ և լրացում կատարելու մասին» օրենքի նախագիծը:
Ըստ Նարեկ Զեյնալյանի՝ առաջարկվում է օրենքում ամրագրել, որ ախտաբանաանատոմիական դիահերձումները կատարվում են հիվանդությունների հետմահու ախտորոշման և մահվան պատճառը որոշելու նպատակով` միայն հիվանդանոցային պայմաններում բժշկական օգնություն և սպասարկում իրականացնող կազմակերպություններում: Ըստ նրա` այդ դրույթի ամրագրումը թույլ կտա ախտաբանաանատոմիական գործունեությունը դարձնել վերահսկելի:
Առաջարկվում է նաև ախտաբանաանատոմիական դիահերձում չկատարելու դեպքում հնարավորություն տալ բժշկական օգնություն և սպասարկում իրականացնող կազմակերպություններում ունենալ դիակի խնամքի, մշակման և պահպանման ծառայություններ:
ՀՀ առողջապահության նախարարի տեղակալ Արմեն Նազարյանը, կարևորելով օրենքի նախագիծը, ներկայացրել է Կառավարության դրական կարծիքը:
Հանձնաժողովը դրական եզրակացություն է տվել օրենքի նախագծին:
