Flyone Armenia-ն Թուրքիայից թույլտվություն է ստացել Երևան-Ստամբուլ-Երևան ուղղությամբ թռիչքների համար. առաջին թռիչքը նախատեսվում է փետրվարին

Flyone Armenia ավիաընկերությունը Թուրքիայի ավիացիոն իշխանությունների կողմից ստացել է Երևան-Ստամբուլ-Երևան ուղղությամբ թռիչքներ իրականացնելու թույլտվություն: Առաջին թռիչքը նախատեսվում է փետրվարի 2-ին:

Այս մասին 1lurer.am-ի հետ զրույցում հայտնեց Flyone Armenia ավիաընկերության խորհրդի նախագահ Արամ Անանյանը: 

«Երևան-Ստամբուլ-Երևան երթուղով տոմսերի վաճառքը երեկվանից սկսվել է: Տոմսերի արժեքը՝ սկսած 39 եվրոյից: Սա շատ լավ հնարավորություն է պոլսահայ համայնքի և մայր հայրենիքի միջև կապն ամրացնելու համար: Կարծում եմ՝ ուղղությունը հաջողված է»,- ասաց Անանյանը:

Երևան-Ստամբուլ չվերթերը կիրականացվեն «Զվարթնոց» միջազգային օդանավակայանից դեպի «Ստամբուլ» միջազգային օդանավակայան:

Հիշեցնենք՝ Flyone Armenia և Pegasus ավիաընկերությունները Երևան-Ստամբուլ-Երևան երթուղով ոչ կանոնավոր  չվերթեր իրականացնելու թույլտվություն են ստացել Քաղավիացիայի կոմիտեից:

Ավելի վաղ հայտնել էինք՝ Հայաստանի քաղաքացիական ավիացիան թույլատրել է Flyone Armenia ընկերությանը չվերթեր իրականացնել Երևան-Ստամբուլ-Երևան երթուղով:

Թուրքական Pegasus ընկերությունը դիմել էր Հայաստանի քաղաքացիական ավիացիայի կոմիտեին՝ Երևան-Ստամբուլ չվերթ իրականացնելու հայտով։