Հայ-ռուսական մշակութային համագործակցության «Դոմ Մոսկվի» մոսկովյան մշակութագործարարական կենտրոնի գլխավոր տնօրեն Վահրամ Կարապետյանը հյուրընկալվել է Արագածոտնի մարզպետարանում։ Նրան ընդունել են մարզպետ Ռազմիկ Պետրոսյանը, Կրթության, մշակույթի և սպորտի վարչության պետ Սեդա Սողոմոնյանը, մարզպետի օգնականներ Լիլիթ Նիկոյանը, Մերի Բադալյանը։
Հանդիպման նպատակն էր քննարկել հայ-ռուսական մշակութային համագործակցության ուղիները, մասնավորապես՝ Արագածոտնում ռուսաց լեզվի անվճար դասընթացների արդյունքներն ու շարունակականությունը, մշակութային և ուսուցողական միջոցառումների անցկացման հնարավորությունները։
Ռազմիկ Պետրոսյանը բարձր է գնահատել «Դոմ Մոսկվի» մոսկովյան մշակութագործարարական կենտրոնի ջանքերը՝ ուղղված դպրոցականների լեզվիմացության բարձրացմանը։ Նա հորդորել է նաև ՌԴ հայկական համայնքներում հայերենի դասընթացներ կազմակերպել, հայկական մշակույթի և պատմության տարածմանն ուղղված միջոցառումներ իրականացնել։
Կողմերը պայմանավորվել են խորացնել առկա համագործակցությունը։ Նախորդ տարում «Դոմ Մոսկվի» կենտրոնի և մարզպետարանի համագործակցությամբ Աշտարակում, Ապարանում, Թալինում դպրոցահասակ երեխաների համար կազմակերպվել են ռուսաց լեզվի անվճար դասընթացներ։
